Tiô tơbleăng, sap hơnăm 2020 troh nôkố, kong pơlê Dak Lak hiăng tơbleăng 16 mơ-éa pơkâ luât ối tung kơvâ khu pơkuâ kăn ƀô̆. A roh pêi cheăng, kong pơlê Dak Lak xuân tối mâu tơdroăng pá puât, tơvâ tơvâ, ối pá tung po rơdâ pêi pro tơdroăng séa ngăn, pro mâu mơ-éa luât ối tung kơvâ pơkuâ kăn ƀô̆; tơdrêng amê pâ thế Khu xiâm pơkuâ kăn ƀô̆ séa ngăn, vâ xing xoăng ƀiên chê̆ viên chưk tơtro ƀă tơdroăng dêi rêm tơring; hnê mơhno pơkâ inhên tơdroăng kơdroh ƀiên chê̆ kơvâ hnê hriâm, kum tơniăn pêi pro tro troăng hơlâ pơkâ, rế tơniăn kơxô̆ thái cô tâng lâm hnê tiô pơkâ...

Pôa Triệu Văn Cường, Ngế xiâm phŏ Khu xiâm pơkuâ kăn ƀô̆, kheăn kơdeăn mâu tơdroăng châ tơƀrê dêi kong pơlê tung pơla kố nah, ƀă pơkâ kong pơlê kal tơ’nôm ƀă tiâ tối mâu tơdroăng tá hâi tŭm hiăng tối a roh pêi cheăng.