Teăng mâ Khu xiâm kal kí, pôa Tô Lâm, Kăn xiâm pơkuâ hnê ngăn Đảng hiăng diâp Pơkâ dêi Khu xiâm kal kí xing xoăng pôa Trần Cẩm Tú, Kăn cheăng tung Khu xiâm kal kí, Kăn pơkuâ hnê ngăn Vi ƀan séa ngăn tơnêi têa to pro Kăn hnê mơhno má môi Khu pơkuâ ngăn cheăng Đảng hneăng má XIII, tơdrêng amê tối rơdêi, kố cho hnoăng ki kal tung pơla tâi tâng Đảng dế thăm hbrâ hneăng hôp mâu râ tơkŭm po la ngiâ Hneăng hôp roh má XIV dêi Đảng.

Khu xiâm kal kí loi ngah khât pôa Trần Cẩm Tú, môi kăn pơkuâ khu râ kăn xiâm, hiăng châ hnê mơjiâng xiâm, xông kân ing tíu pêi cheăng, rơkê trâu ƀă hên túa ki rơkê tơtro tơdroăng hnê mơjiâng, nah hiăng pro hên kăn pơkuâ ki kal dêi Đảng a Tơnêi têa ƀă kong pơlê kô tơleăng lĕm tro tơdroăng cheăng rêm hêi dêi Đảng; hnê mơhno Ƀơrô Khu xiâm Đảng rơtế mâu kơ koan ki tơdjâk tơkŭm pêi pro lĕm tro tơdroăng pêi cheăng; tơniăn tơdroăng pêi cheăng tơtro, môi tuăn, tơdâng tơ’mô dêi khu cheăng kal kí.

A ngiâ, pôa Trần Cẩm Tú tơkŭm hnê mơhno Ƀơrô xiâm Đảng ƀă mâu kơ koan ki tơdjâk kêi đeăng lĕm tro tơdroăng hbrâ ăm Hneăng hôp Đảng mâu râ, la ngiâ tơkŭm po Hneăng hôp má XIV dêi Đảng.