Klêi kơ’nâi sap ing hâi châ Kăn xiâm pơkuâ hnê ngăn Đảng troh lăm kơ-êng, mơhnhôk thế, pôa Thào Dìn – môi ngế kuăn pơlê pêi chiâk deăng mơngế Mông ối a thôn Cốc Phương, cheăm Bản Lầu, tơring Mường Khương, kong pơlê Lào Cai nôkố hiăng vâ châ 60 hơnăm xuân ối pâ mâu rơkong pơchân tiah hmâ laga trâu rơdâ ing Kăn xiâm pơkuâ  ki kân má môi dêi Đảng.

Hơnăm mê nah, pôa cho ngế teăng mâ kuăn pơlê pêi chiâk deăng ki rơkê dêi Mường Khương xuân môi tiah Lào Cai châ pôa Nguyễn Phú Trọng - Kăn xiâm pơkuâ hnê ngăn Đảng troh lăm pôu a hngêi. Hdrối mê, hên ngế hiăng ‘nâi troh Thào Dìn ƀă inâi cho ‘’pơtáu xik’’, pêi lo liăn rêm hơnăm ing tê xik tâk troh 700 rơtuh liăn. Laga drêng Kăn xiâm pơkuâ hnê ngăn Đảng troh, ôh tá xê to tơpui mâu tơdroăng ki kheăn kơdeăn, pôa ối tối mâu tơdroăng pro tâi tâng rêm ngế ing kăn ƀô̆, kăn pơkuâ troh kuăn pơlê rơtế thế tơmiât.

Mê cho mơnhông cheăng kâ thế tơtrŏng kum dêi pó rơtế kro mơdrŏng, ôh tá ăm ai tơdroăng ki kơtăn kro mơdrŏng hơngế ƀă kơtiê; ngế hiăng kro mơdrŏng thế tŏng veăng mơngế ối kơtiê pá puât, đảng viên kro mơdrŏng veăng gum ăm đảng viên ối pá puât  tâ vâ ‘’tâi tâng rơtế kro mơdrŏng, tâi tâng rơtế hluăn ing kơtiê’’.

“Tâng pôa tối tiah mê, mê á xuân thế hriâm xêh, tơmiât troăng pro tiah lâi vâ rơpŏng mơnhông, klêi mê rŭm môi tuăn, ai tơdroăng ki klâi pá lâp pơlê thế veăng gum dêi pó mê nếo kâi pơhlêh’’.

Ƀă Thào Sìn, mâu rơkong pơchân dêi Kăn xiâm pơkuâ hnê ngăn Đảng xuân cho tơdroăng ki mơhnhôk vâ troh hâi kố, mơhé ôh tá ai tŭm kế kâ, tơmeăm ‘măn, pôa xuân rah rêh ối tung toăng hngêi râ má 4 ki hmâ hlo tiah hmâ, rêm hâi to lăm pêi chiâk deăng a ngo. Kuăn pơlê thôn Cốc Phương hâk vâ tơ’noăng, nôkố ôh tá ai rơpŏng kơtiê, ai troh lối 70% cho rơpŏng kro mơdrŏng, châ mơnhên cho thôn pơlê tiô túa nếo.

Xuân cho ngế châ Kăn xiâm pơkuâ hnê ngăn Đảng kơ-êng, tơpui tơno, Trung tă Nguyễn Ngọc Hà, Kăn xiâm Đông mô đô̆i gâk tơkăng kong Bản Lầu, tơring Mường Khương xuân pâ mâu rơkong mơhnhôk dêi Kăn xiâm pơkuâ hnê ngăn Đảng, rơtế rơkong pơchân tối ăm mâu kăn ƀô̆, mâu lêng thế pêi lĕm tro tơdroăng pơkuâ tơkăng kong, tơpui kâ ƀă kong têa ê, ki rơhêng vâ tối thế mơjiâng tâi tâng kuăn pơlê veăng gâk kring krá tơniăn.

“Tiô tơdroăng ki pôa Nguyễn Phú Trọng - Kăn xiâm pơkuâ hnê ngăn Đảng, ngin hiăng gum kuăn pơlê ƀă mâu tơdroăng pêi ki pơxúa môi tiah axoăng ăm hdrê pêt, mơnăn păn, hnê mơhno kuăn pơlê pơhlêh troăng pêi cheăng vâ tơniăn tơdroăng rêh ối, mơjiâng mâu hngêi trung, tíu pơtâp klê têa hbrâ mơdât klâk têa ăm vâi hdrêng vâ vêh tơbâ mâu tơdroăng tuăn pâ dêi kuăn pơlê hiăng tŏng gum, rŭm ƀă ngin’’.

Pâ vế rơkong pơchân dêi Kăn xiâm pơkuâ hnê ngăn Đảng, khu râ kăn pơkuâ hnê ngăn cheăng Đảng, khu râ kăn pơkuâ, khu lêng ƀă kuăn pơlê 12 hdroâng kuăn ngo nhŏng o a Bản Lầu mâu hơnăm hiăng hluâ đi đo rŭm môi tuăn, khŏm rak krá tơniăn hnoăng pơkuâ, tơniăn tơkăng kong. Bản Lầu nôkố ôh tá xê to tot to a tíu pêt hên xik, priât dêi Lào Cai, mê ối tơ’nôm hrĭng hectar chế, loăng hâng, ai tá kơpong pêi báu ki xú kơhiâm má môi Séng Củ, mơ-eăm chiâng cheăm thôn pơlê nếo ki tơtêk tung la ngiâ achê kố ah.