Tung rôh ki tối a kơpêng ô tô krâ kơxô̆ 42C-145.16 xua Nguyễn Quang Nhãn, 32 hơnăm, ối a cheăm Quế Châu, tơring Quế Sơn, kong pơlê Quảng Nam vê kơtâu a troăng ngi kong pơlê Quảng Nam lăm kong pơlê Kon Tum troh a văng Lò Xo, troăng km 1420+170 ối tung thôn Măng Khênh, cheăm Đăk Man, tơring Đăk Glei, kong pơlê Kon Tum mê kơdrâ trâm xía vâ.

Tíu ki trâm xía vâ mê ăm hlo ô tô xua Nguyễn Quang Nhãn vê klêh tung klôh ki hdoăng mơ’no têa a troăng. Rôh xía vâ mê pro ngế ki vê rơxế Nguyễn Quang Nhãn ƀă ngế ki kum vê rơxế Nguyễn Tấn Toàn, 25 hơnăm rơtế ối a cheăm Quế Châu, tơring Quế Sơn, kong pơlê Quảng Nam hlâ, rơxế ô tô tơ’nhiê tâi. Tiah mê bu tung 4 hâi hdrối a kong pơlê Kon Tum pơtối ai 3 rôh xía vâ a troăng prôk ki ó pro 4 ngế hlâ ƀă 26 ngế tro rong.