Tơdrêng a Leh tơbleăng gum kuăn pơlê tro tơ’nhiê dêi kế tơmeăm khoăng xua kong mêi khía mơhot kân rôh má 3 pro mê  Khu pơkuâ hnê ngăn Đảng, Hô̆i đong hnê ngăn, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê Kon Tum tơkŭm po a kơxê lơ 12/9 hiăng ai 203 kơ koan, tíu pêi cheăng, khu mơdró ƀă mâu ngế krê tung kong pơlê gum tơdrêng lối 425 rơtuh liăn, tơdrêng amê, ai ta 23 kơ koan, khu pơkuâ cheăng, khu mơdró hiăng tơkêa kô gum kơxô̆ liăn lối 2 rơtal 65 rơtuh liăn. Tung mê hên tíu pêi cheăng, tơring cheăm gum ƀă kơxô̆ liăn hên môi tiah kăn ƀô̆, kuăn pơlê pơlê kong kơdrâm Kon Tum gum 400 rơtuh liăn, tơring Đăk Tô gum 30 rơtuh liăn.

Ƀă hiâm mơno “tŏng gum dêi rơpó” kô veăng sĭng khéa tơdroăng ki châi heăng pá puât, kăn ƀô̆ ƀă kuăn pơlê kong pơlê Kon Tum dế pơtối ai mâu tơdroăng pro ai pơxúa lĕm veăng tơlo gum kuăn pơlê mâu kong pơlê, pơlê kong kân peăng Kơnhŏng tro tơ’nhiê hngêi trăng tơmeăm khoăng xua khía mơhot kân rôh má 3 pro ƀă kơxô̆ liăn xuân môi tiah mâu kế kâ, tơmeăm xúa ki kal.