Tiô khu tối pơtâng ‘na hyôh kong prâi kong pơlê Lâm Đồng tung mâu hâi hdrối nah, a kong pơlê ai kong mêi krâ kơvâ hlối mê kân ƀă ai tíu kong mêi kân khât. Kong mêi kân, rơtế ƀă tơdroăng ki tro têa lân a mâu kơpong thông kơphô̆, kơpong kĭng têa kroăng, tơnêi tơhnah a mâu kơpong ki tơnêi ngo rơnâk.

Vi ƀan hnê ngăn kong pơlê Lâm Đồng hiăng pơtroh hlá mơ-éa pơtroh hnê mơhno mâu kơ koan, tíu pêi cheăng a kong pơlê hbrâ rơnáu, tơkŭm tơbleăng mâu túa pơkâ, troăng hơlâ hbrâ mơdât tơnêi tơhnah, têa kân lân. Vi ƀan hnê ngăn mâu tơring, pơlê kong kơdrâm Đà Lạt ƀă Bảo Lộc hnê mơhno mâu khu tơrŭm gâk plâ hâi plâ măng tung rơnó mê hngê têa kân lân, séa ngăn tơdroăng ki ôh tá tơniăn dêi kong prâi, tối tơbleăng teăm tơdrêng troh mâu thôn, pơlê kuăn pơlê vâ hbrâ ví ƀă mâu rôh kong mêi têa kân lân lu, tơnêi tơhnah tơhnâp, khía jâ kơdo rơvê.