Tung mâu rơkong tơpui tối, pâ thế châ tối a rôh trâm, ki xiâm cho mâu tơdroăng ki pá puât tung bro hlá mơ-éa tung kơvâ tơnêi tơníu. Pôa Lương Thanh Bình - Kăn phŏ pơkuâ Khu ngăn tơmeăm khoăng tung têa, a tơnêi ƀă hyôh kong prâi Gia Lai ăm ‘nâi, tung la ngiâ ah kô hơ’lêh kơvâ cheăng hbru hlá mơ-éa mơnhên hnoăng rak xúa tơnêi dêi mâu rơpŏng, ngế krê ing Ƀơrô cheăng chêh inâi tơnêi tơníu râ kong pơlê a tíu pêi cheăng ƀơrô cheăng râ tơring pơkuâ ngăn.

Pakĭng mê, kuăn pơlê tơring Phú Thiện ối tối hên mâu tơdroăng pâ thế ki pơrá phá dêi rơpó, môi tiah pá tung xoăng liăn mâu tơdroăng tơkêa bro ối tung tơdroăng pơkâ tơnêi têa ‘na mơnhông cheăng kâ rêh ối - pơlê pơla kơpong hdroâng kuăn ngo; mâu tơdroăng ki séa ngăn kơchơ tê mơdró phon rơvât ƀă pơkeăng xôh kơdê oâ hdrong; ôh tá tơniăn tung tơbleăng hnê cheăng pêi tung kơpong hdroâng kuăn ngo.