Tung rôh lăm pôu pêi cheăng a kong pơlê Sơn La a hâi lơ 8/1/2014, pôa Nguyễn Phú Trọng - Kăn xiâm pơkuâ hnê ngăn Đảng ƀă khu ki pêi dêi hnoăng cheăng hiăng troh pôu ƀă pêi cheăng a Hngêi kơmăi on tơhrik Sơn La. Ƀă kăn ƀô̆, kŏng nhân, mâu ngế ki hâk tơngăm châ tơdah kăn xiâm hnê ngăn Đảng mê cho mâu tơdroăng ki chôu vế, tơdroăng ki ối tung hiâm mơno ôh tá kâi piu.

Hiâm mơno lĕm, têm rơpiât ƀă mâu rơkong pơchân dêi kăn xiâm hnê ngăn Đảng đi đo châ rêm ngế chôu pâ bă hriâm tâp. Kăn xiâm hnê ngăn Đảng rơhêng vâ tâi tâng kăn ƀô̆, kih sư, khu ki rơkê, kŏng nhân viên dêi Kŏng ti pơtối mơdêk ki rơkê, tơƀrê hiăng pêi klêi tung tung pơla mơjiâng, xúa hngêi kơmăi, pơtối tối rơdêi ki châ vâi loi tơngah, hnoăng cheăng ki kal dêi hngêi kơmăi on tơhrik Sơn La; kum mơjiâng, xúa tơniăn, tơƀrê mâu kế tơmeăm hngêi kơmăi on tơhrik ki ê dêi tơnêi têa.

Tâng tối pôa Nguyễn Phú Trọng - Kăn xiâm pơkuâ hnê ngăn Đảng kơtê ihiâm, kăn ƀô̆ ƀă kuăn pơlê Quảng Ngãi mơjo khéa tá kâi tối. Pôa Nguyễn Phú Trọng - Kăn xiâm pơkuâ hnê ngăn Đảng cho um méa, djâ troăng ahdrối ‘na hiâm mơno kăch măng; plâ rơxông pêi cheăng pleăng ăm Đảng, ăm Tơnêi têa ƀă kuăn pơlê. Tung tuăn ngoâ pâ vế dêi kăn ƀô̆ ƀă kuăn pơlê Quảng Ngãi, pôa Nguyễn Phú Trọng - Kăn xiâm pơkuâ hnê ngăn Đảng hiăng hên xôh laga ki chôu pâ má môi cho drêng pôa Trọng troh a Quảng Ngãi veăng Leh hiăng mơjiâng pro kêi đeăng Kơpong tơbâ pôa Phạm Văn Đồng, Ngế pro xiâm hnê ngăn tơnêi têa hneăng hdrối.

Hâi lơ 31/8/2008, pôa Nguyễn Phú Trọng - Kăn xiâm pơkuâ hnê ngăn Đảng hiăng rah prôk to rơxế lơtreng ing Hà Nội mot a Quảng Ngãi. Tơdah Kăn xiâm pơkuâ hnê ngăn Đảng a tíu tơkôm rơxế lơtreng Quảng Ngãi, pôa Phạm Đình Khối ƀă hên ngế ôh tá kâi kơtôa ki tâ rơrêk tung hiâm mơno:

“Môi ngế kăn pơkuâ râ xiâm môi tiah mê prôk to rơxế lơtreng ing Hà Nội mot. Drêng diâp kơpâu reăng ăm Kăn xiâm pơkuâ hnê ngăn Đảng ƀă rup kŏng, kuâ Kăn xiâm pơkuâ hnê ngăn Đảng mê á tâ ôh tá ai kơtăn dêi kăn xiâm pơkuâ xếo, mê cho tơdroăng tuăn pâ dêi khu pú tá hiâm mơno. Troh ối pêi cheăng bu 3 hâi tê laga prôk pêi cheăng đi đo. Kơ’nâi mê lăm a Tây Trà, chu lăm pôu cheăm, trâm kuăn pơlê vâ kơ-êng, diâp kơxuô tơmeăm kŭn tê, laga Kăn xiâm pơkuâ hnê ngăn Đảng, mê cho tơdroăng tuăn pâ ki kân má môi’’.

Rơtế ƀă lâp tơnêi têa, kuăn pơlê tơring Mỹ Xuyên, kong pơlê Sóc Trăng châi heăng khât drêng tâng pôa Nguyễn Phú Trọng - Kăn xiâm hnê ngăn Đảng kơtê hiâm. Pro tơdroăng ki châi heăng chiâng tơdroăng cheăng Kăch măng, Đảng ƀô̆, kăn pơkuâ ƀă kuăn pơlê tơring Mỹ Xuyên pơtối tơrŭm, kơhnâ, rơkê, khŏm mơ-eăm mơjiâng Đảng, mơjiâng khu pơkuâ tơdroăng kal kí krúa, rơdêi, mơjiâng pơlê cheăm rế hía rế kro mơdrŏng, hơniâp ro môi tiah Kăn xiâm hnê ngăn Đảng rơhêng vâ.

Pôa Lương Minh Quyết, kăn hnê ngăn Vi ƀan tơring Mỹ Xuyên hneăng hdrối tối, kơtăn kố 10 hơnăm, pôa Nguyễn Phú Trọng - Kăn xiâm pơkuâ hnê ngăn Đảng lăm pôu pêi cheăng a cheăm Ngọc Tố (1 tung 3 cheăm thôn pơlê nếo ki apoăng dêi kong pơlê Sóc Trăng), drêng châ trâm kăn xiâm pơkuâ hnê ngăn Đảng chôu vế tung pôa um méa dêi ngế kăn xiâm hnê ngăn Đảng têm rơpiât, hơniâp lĕm, khên tơnôu ƀă ó rơdêi. Pôa Lương Minh Quyết tối:

“Nôkố Meh hiăng prôk lêk, ‘măn chôu ăm á xuân môi tiah rêm ngế ki ê môi tơdroăng ki khéa hơ’nêng ó khât. Tung tơdroăng ki châi heăng kố, á rơhêng vâ pin athế pơhlêh bro ki châi heăng mê chiâng tơdroăng cheăng Kăch măng; rêm ngế kăn ƀô̆, đảng viên ƀă kuăn pơlê mơ-eăm hriâm tâp tiô troăng ki lĕm dêi meh Nguyễn Phú Trọng - Kăn xiâm pơkuâ hnê ngăn Đảng vâ veăng kum mơjiâng pơlê cheăm tơná, tơnêi têa tơná rế hía rế kro mơdrŏng, rơkê ƀă krá rơdêi”.