Hâi lơ 14/8/2014, tung roh pêi cheăng a pơlê kong kân Cần Thơ, pôa Nguyễn Phú Trọng - Kăn xiâm pơkuâ hnê ngăn Đảng rơtế khu râ kăn pêi cheăng Tơnêi têa hiăng mơdoh chôu troh lăm pôu, pêi cheăng ƀă Đảng ủy, Khu xiâm pơkuâ lêng Kuân khu 9. Mơnhên tíu pêi cheăng dêi Kuân khu cho môi tíu hbrâ mơdât ton xŏn kal khât, Kăn xiâm pơkuâ hnê ngăn Đảng pơkâ tung rơxông nếo ai tơdroăng ki rĕng, pá puât, ôh tá ‘nâi tối hdrối, Kuân khu 9 kal pơtối hbrâ ‘nâi tơdroăng kal, tơdroăng nôkố, ôh tá lôi ăm kơdrâ, tơngôu, tơniăn hbrâ tơplâ, gum tung tơdroăng tơplâ tung rêm tơdroăng; gâk kring krá tơniăn kơpong têa kơxĭ rơlố, hnoăng pơkuâ Tơnêi têa.

Pêi pro hnê mơhno dêi pôa Nguyễn Phú Trọng, Kăn xiâm pơkuâ hnê ngăn Đảng, mâu hơnăm hiăng hluâ, kăn ƀô̆, mâu lêng Khu lêng Kuân khu 9 đi đo mơnhông hiâm mơno rŭm môi tuăn; pêi pro tơdâng tơ’mô, châ tơƀrê mâu troăng mơjiâng Đảng ƀô̆ Kuân khu ó rơdêi ‘na kal kí, troăng tơmiât, hiâm mơno, khu cheăng ƀă kăn ƀô̆.

-Pơla ối rêh nah, pêi hên tơdroăng cheăng, pôa Nguyễn Phú Trọng - Kăn xiâm pơkuâ hnê ngăn Đảng đi đo mơhno mâu tuăn pâ ƀă tơmâng khât kơ mâu kăn ƀô̆, mâu lêng Tuk dêi Việt Nam tối tơdjuôm ƀă mố đô̆i Trường Sơn tối krê. Rôh tơpui tơno dêi pôa Nguyễn Phú Trọng - Kăn xiâm pơkuâ hnê ngăn Đảng tung rôh lăm pôu pêi cheăng a Kơpong 4 dêi Lêng tuk a hâi lơ 5/5/2016, Kăn xiâm pơkuâ hnê ngăn hiăng kơ-êng tơdroăng rêh ối dêi kăn ƀô̆, mâu lêng ƀă kuăn pơlê rơlố Trường Sa; mơhnhôk ngin môi tuăn, mơ-eăm tơkâ luâ tŭm tơdroăng pá vâ pê klêi hnoăng cheăng ki Đảng, Tơnêi têa pơcháu.

Kăn xiâm pơkuâ hnê ngăn Đảng loi khât a tuăn ngôa khên tơnôu tơdroăng kal kí, ai hiâm tuăn vâ tơplâ, hbrâ rơnáu tơplâ ta troh hlâ dêi mâu kăn ƀô̆, mâu lêng Tuk tối tơdjuôm ƀă kăn ƀô̆, mâu lêng Kơpong 4 tối krê tung hnoăng cheăng kring gak hnoăng pơkuâ têa kơxĭ, rơlố dêi Tơnêi têa.

Thươ̆ng tă Nguyẽn Văn Khương - Ngế cheăng kal kí rơlố Song Tử Tây ối chôu pâ rơkong ki vâi ô eăng dêi pôa Nguyễn Phú Trọng -  Kăn xiâm pơkuâ hnê ngăn Đảng tơpui “Inâi châ pơ-eăng cho tơdroăng ki tĭng, ki kơnía má môi”.

“Pôa Nguyễn Phú Trọng - Kăn xiâm pơkuâ hnê ngăn Đảng cho ngế ki kơhnâ ‘na tơdroăng cheăng, ‘na tuăn tơmiât tơpui tơno, ‘na túa pêi cheăng la tơdroăng ki a ối chôu pâ mê cho rơkong tối tơbleăng dêi Kăn xiâm pơkuâ hnê ngăn tối a hneăng hôp tung lâp tơnêi têa mâu kơ koan Pêi hnoăng cheăng ăm tơnêi têa tơbleăng  Pơkâ 13 tơdroăng chêh dêi Đảng (Hâi lơ 15 /9/2021). Mê cho: Rơxông mơngế bu rêh ai môi xôh, thế rêh ti lâi ăm i tro, ai pơxúa, vâ pôi tá khéa dêi tơrôu tơmiât troh mâu tơdroăng pêi pro ôh tá tro, tá pơxúa. Liăn ngân hên pro ki klâi, hlâ ah ôh tá châ djâ.  Inâi châ pơ-eăng mê cho tĭng, kơnía má môi”.

-Tung roh troh lăm pôu, pêi cheăng a kong pơlê Kon Tum a khế 4/2021, pôa Nguyễn Phú Trọng - Kăn xiâm pơkuâ hnê ngăn Đảng, Kăn xiâm hnê ngăn Kuô̆k hô̆i mơdoh chôu troh lăm pôu kuăn pơlê hdroâng kuăn ngo Bơhnéa a pơlê Đăk Mút, cheăm Đăk Mar, tơring Đăk Hà.

A kố, Kăn xiâm pơkuâ hnê ngăn Đảng ti tăng plĕng ‘na tơdroăng rêh ối, tơmâng tơdroăng tơpui tối, pói vâ ƀă pơchân kuăn pơlê mơnhông hiâm mơno rŭm môi tuăn, tơmiât pêi rơkê tung pêi cheăng pêt mơjiâng tơmeăm.

Pâ rơkong pơchân dêi Kăn xiâm pơkuâ hnê ngăn Đảng, 13 hơnăm hiăng hluâ, 148 rơpŏng kuăn pơlê Đăk Mút hiăng tơkâ hluâ hên tơdroăng pá puât vâ mơnhông pêt mơjiâng tơmeăm, pơhlêh tơdroăng rêh ối ƀă mơjiâng châ tơƀrê thôn pơlê nếo. Ngoh A Nguyên, Kăn phŏ pơkuâ Đoân Droh rơtăm cheăm Đăk Mar, pro Kăn pơkuâ thôn Đăk Mút, mơnhên:

“Chôu vế rơkong Pôa Trọng pơchân á hiăng pơhlêh tơdroăng tơmiât, troăng pêi. Ƀă tŭm tơdroăng á hiăng mơjiâng Kâu lăk ƀô̆ Droh rơtăm tiô khôp mơnhông cheăng kâ vâ ing mê droh rơtăm kô kâi păn dêi châ tơná, chiâng pêi cheăng kâ. Nôkố, Kâu lăk ƀô̆ hiăng ai lối 15 ngế tơkŭm châ droh rơtăm vâ mơnhông cheăng kâ klêi mê veăng tung Đoân, Hô̆i’’.