Pôa Y Dhun Hmok, krâ pơlê ƀuôn Dur 1 xuân ối chôu pâ tung tuăn ngôa mâu rơkong tơpui, kơ-êng dêi pôa Nguyễn Phú Trọng, Kăn xiâm pơkuâ hnê ngăn cheăng Đảng drêng lăm pôu ƀă veăng ai mâ a Hâi mơdĭng Tơrŭm tâi tâng mâu hdroâng kuăn ngo cheăm Dur Kmăn, tơring Krông Ana, kong pơlê Dak Lak a mơ’nui hơnăm 2018.

Pôa hâk tơngăm châ teăng mâ vâi krâ nhŏng tung mâu pơlê cheăm diâp ếo chal krâ dêi mơngế Rơđế ăm kăn xiâm pơkuâ hnê ngăn cheăng Đảng. Pôa Y Dhun Hmok chôu vế:

“Pôa tối, vâi krâ nhŏng o athế tơkŭm pêi cheăng kâ mơdêk tơdroăng rêh ối, kuăn ‘nĕng mê athế châ hriâm tâp cho rơhêng vâ dêi Pôa. Mê troh nôkố vâi krâ nhŏng o hiăng bê tŭm kế kâ, ếo xâp, kuăn ‘nĕng châ hriâm tâp, mê cho tơdroăng ki phiu ro má môi. Pơlê cheăm mê hiăng pơhlêh. Vâi krâ nhŏng o tung pơlê mơnê khât hiâm mơno pâ kơ vâi krâ nhŏng o dêi Pôa hiăng kum ăm vâi krâ nhŏng Dur Kmăn”.

Ƀă pôa Hmyet, kăn pơkuâ Chi ƀô̆ hlối cho ngế pơkuâ pơlê Tiêng 2, cheăm Tân Sơn, pơlê kong kơdrâm Plei Ku, kong pơlê Gia Lai, xuân ối pâ tung hiâm mơno ‘na môi ngế kăn pơkuâ ki têm rơpiât, vâ achê ƀă kuăn pơlê:

“Hơnăm 2011, pôa Nguyễn Phú Trọng ai troh pôu péa to pơlê Jarai dêi ngin kố a cheăm Ia Tiêm ƀă cheăm Ayun, tơring Čư̆ Sê. Vâi krâ nhŏng o ngin hlo pôa vâ achê ƀă tơmâng ngăn troh kuăn pơlê khât. Pôa cho ngế kăn pơkuâ ki têm rơpiât hăng pơkuâ Đảng pin plâ mơdât tơdroăng kâ kơhveăm liăn ngân hlo tơƀrê khât. Á ƀă vâi krâ nhŏng o Jarai loi khât kơnôm ai Đảng mê cheăng kâ rêh ối pơlê pơla, tơdroăng rêh ối dêi vâi krâ nhŏng o Tây Nguyên ngin kô pơhlêh tro tâ”.

Mơhno hiâm mơno sĭng khéa kơ pôa Nguyễn Phú Trọng, kăn xiâm pơkuâ hnê ngăn cheăng Đảng, pôa Bon Yô Soan, ngế ki châ kuăn pơlê loi a pơlê kong kơdrâm Đà Lạt, kong pơlê Lâm Đồng, mơhno hiâm mơno loi  ngah tung tơdroăng pơkuâ mơjiâng tơnêi têa dêi Đảng:

“Hnoăng cheăng plâ mơdât kâ kơluâ, kâ kơhveăm liăn ngân tung mâu kăn ƀô̆, đảng viên châ pôa Nguyễn Phú Trọng pêi pro kơtăng khât vâ pôi tá ai kơpong mơdât. Nôkố, vâi krâ nhŏng o hdroâng kuăn ngo kong pơlê Lâm Đồng đi đo loi khât tung tơdroăng pơkuâ dêi Đảng”.

Mơhno tối tơdroăng ki mơjo pâ kơ pôa Nguyễn Phú Trọng - Kăn xiâm pơkuâ hnê ngăn, pôa Ƀon Yô Soan, mơngế ki châ kuăn pơlê loi tơngah má môi dêi pơlê kong kơdrâm Đà Lạt, kong pơlê Lâm Đồng tối, mơhno tối hiâm mơno loi tơngah tung hnoăng pơkuâ ngăn mơjiâng tơnêi têa dêi Đảng:

“Tơdroăng tơplâ hbrâ, tơplâ mơdât ƀă tơdroăng kâ kơluâ, kâ kơhveăm, mâu tơdroăng xôi ƀă mâu kăn ƀô̆, đảng viên hiăng châ pôa Nguyễn Phú Trọng pêi pro kơtăng khât ôh tá ai tíu ki lâi tro mơdât. Dế nôkố, vâi krâ-nhŏng o hdroâng kuăn ngo kong pơlê Lâm Đồng đi đo loi tơngah tiô tơdroăng pơkuâ ngăn dêi Đảng”.