Tung mâu hâi hiăng hluâ, tơmâng tơdroăng kuăn pơlê mâu kong pơlê peăng Kơnhŏng tơnêi têa dế tro lŭp ó xua kong mêi têa lân lu klêi kơ’nâi roh kong mêi khía mơhot roh má 3, nâ Nguyễn Hồng Tố Diễm, ối a pơlê kong kơdrâm Plei Ku, kong pơlê Gia Lai hiăng hbrâ mâu kế kâ ƀă têa krúa vâ tŏng gum kuăn pơlê kơpong têa lân lu. Mâu tơmeăm châ nâ djâ troh tíu tơkŭm môi tíu, hdrâ lĕm vâ tơkôm rơxế pơto djâ.

‘’Á ƀă nâ á, má nâ o rơtế dêi pó pơtroh môi iâ kơxuô tơmeăm ăm kuăn pơlê kơpong kong mêi khía mơhot, xuân pói vâ mâu ngoh nâ mơhé troăng hơngế xuân kô chiân troh ăm kuăn pơlê. Xuân pói vâ cho rêm ngế kô kum kuăn pơlê a mâu kơpong dế tro lŭp tơmeăm khoăng’’.

Troh lâp lu tơdroăng ‘’Mâu ngế ki chía hôm iâ kum mâu ngế ki pá puât tâ’’, hên ngế krê tung kong pơlê Gia Lai xuân kơbông krếo dêi nhŏng o, pú hmâ veăng tơlo xup kơxŏng khăng, têa ôu ƀă pơkeăng vâ pơtroh kum kuăn pơlê kơpong têa lân lu mâu kong pơlê peăng Kơnhŏng tơnêi têa. Ngoh Võ Phi Hổ, ngế pơkuâ rơxế Phi Hổ, kơtâu troăng Gia Lai – Đà Nẵng tối ăm ‘nâi, klêi kơ’nâi ai rơkong krếo thế, tung kơxê kố lơ 11/9, hiăng ai hên mâu ngế ki tŏng gum mơngế pá puât troh a tíu tơkŭm tơmeăm môi tíu vâ pơtroh mâu tơmeăm ki kal xúa rêm hâi, tŏng gum mâu tơdroăng pá puât ki kuăn pơlê hên tíu a peăng Kơnhŏng tơnêi têa dế trâm tơdroăng kong prâi pro.

“Á teăng mâ kơbông krếo vâ kuăn pơlê Gia Lai rơtế tơdjuôm ivá djâ mâu kơxuô tơmeăm, tơdroăng tuăn pâ dêi kuăn pơlê Gia Lai tŏng gum kuăn pơlê a peăng Kơnhŏng tơnêi têa. Tơdrêng amê á xuân tối tơbleăng khu râ kăn pơkuâ vâ mung tíu tê vĕ dêi Công viên Đồng Xanh cho tíu tơkŭm mâu tơmeăm ki kal xúa rêm hâi xua tíu kố ai tíu kân rơdâ ƀă rơxế ôh tá mơdât pơto hngăm’’.

Xuân tung hâi lơ 11/9, Khu pơkuâ hnê mơhno má môi Khu kăn pơkuâ hnê ngăn Đảng kong pơlê Gia Lai ai mơ-éa ki thâ rĕng pơkâ mâu khu râ kăn pơkuâ hnê ngăn cheăng Đảng, tíu cheăng, tơring tung kong pơlê thâ tơkŭm po pêi pro kơbông krếo tŏng gum kuăn pơlê tro lŭp tơmeăm. Tung pơla pêi pro kơbông krếo sap ing kố troh tâi hâi lơ 13/9/2024. Ing kơxô̆ liăn dêi kơ koan, Vi ƀan Măt trâ̆n Tơnêi têa Việt Nam kong pơlê Gia Lai xuân hiăng diâp kơxô̆ liăn veăng tơlo 400 rơtuh liăn pơtroh kuăn pơlê mâu kong pơlê peăng Kơnhŏng.

A Dak Lak, ƀă mâu tơdroăng pêi ki nhên, kuăn pơlê mâu hdroâng kuăn ngo a Dak Lak dế ai mâu tơdroăng pêi tŏng gum ăm kuăn pơlê peăng kơnhŏng tro lŭp ó xua kong prâi pro, mơhno hiâm mơno tŏng kum dêi pó, rŭm môi tuăn pâ dêi pó dêi hdroâng mơngế Việt Nam.

Á tơring Lăk, môi tung mâu tơring pá puât má môi dêi kong pơlê Dak Lak, tíu ai troh 66% cho kuăn pơlê hdroâng kuăn ngo rêh ối, kuăn pơlê dế rơtế dêi pó veăng tơlo hâi pêi cheăng, ngế ki ‘nâ tơlo tơmeăm rĕng pro mâu ‘’Kơ’lo ya-ua tuăn pâ’’ pơtroh troh kuăn pơlê peăng Kơnhŏng tơnêi têa tung roh trâm kong prâi pro ôh tá tơniăn. Kuăn pơlê hiăng ôh tá xâu pá puât pôu mâu pôm prếl hngêi pêt châ djâ tơkŭm môi tíu a hngêi chuô Quảng Trạch, cheăm Dak Liêng, tơring Lăk vâ tŏng gum.

A Kon Tum, Khu pơkuâ tơdroăng cheăng Đoân Droh rơtăm Kon Tum kơbông krếo mâu râ xiâm Đoân rơtế lối 33.000 đoân viên, droh rơtăm tung kong pơlê veăng tơlo liăn ngân, kế tơmeăm khoăng ăm kuăn pơlê rơnêu kế tơmeăm khoăng xua kong mêi khía mơhot pro. Roh veăng tơlo tŏng gum kuăn pơlê châ Khu pơkuâ Đoân Droh rơtăm kong pơlê Kon Tum pêi pro tung 5 hâi, sap ing kơxê lơ 11/9 troh tâi hâi lơ 15/9.

Klêi kơ’nâi Leh mơhnhôk ƀă hiâm mơno tŏng kum dêi tâi tâng kăn ƀô̆, kŏng chưk, viên chưk kơ koan Khu pơkuâ Đoân Droh rơtăm Kon Tum hiăng vâ veăng tơlo liăn ngân, kế tơmeăm khoăng gum kuăn pơlê kơpong kong mêi têa lân lu peăng Kơnhŏng tơnêi têa. Ngoh Nguyễn Văn Mạnh, Kăn phŏ pơkuâ hnê mơhno má môi Đoân Droh rơtăm kong pơlê Kon Tum tối ăm ‘nâi:

“Khu pơkuâ hnê ngăn Đoân Droh rơtăm kong pơlê xuân hiăng pêi pro troh tâi tâng mâu khu tơrŭm cheăng Đoân mâu tơring, pơlê kong kơdrâm. Pakĭng mê xuân cho môi troăng tơdjêp mâu khu tŏng gum. Mâu khu tơrŭm cheăng đoân tơring, pơlê kong kơdrâm ai mâu tíu tơdah kơxô̆ tơmeăm. tâi tâng mâu tơmeăm ki kal xúa tung pơlê kong kơdrâm xuân môi tiah mâu tơring tơkŭm a plông kân. Ing mê, Khu pơkuâ hnê ngăn Đoân Droh rơtăm kong pơlê hiăng tơdjêp ƀă mâu tíu cheăng pơto tơmeăm tê kơtê ăm kuăn pơlê peăng Kơnhŏng vâ tŏng gum kuăn pơlê tơkâ hluâ tơdroăng kong prâi pro ôh tá tơniăn kố’’.