Xuân kơxê hâi lơ 6/6, Kuô̆k hô̆i pê klêi tơdroăng kơ-êng ƀă tiâ tơdroăng kơ-êng a rôh hôp má 7. Tối tơdrăng ƀă hnoăng cheăng pêi, mê cho ăm ‘nâi tơdjuôm dêi mâu kăn ƀă kuăn pơlê tung 2 hâi tơdế kơ-êng ƀă tiâ. Pôa Trần Hồng Hà, Ngế pro xiâm phŏ hnê ngăn Chin phuh ƀă 4 Ngế xiâm, mâu ngế pơkuâ mâu kơvâ cheăng hiăng tiâ hên tơdroăng ki mâu kăn ƀă Kuô̆k hô̆i kơ-êng.

Mâu kăn Kuô̆k hô̆i hiăng kơ êng mâu tơdroăng ‘nung ‘nâi, la nhên hleăng, tro mâu tơdroăng, tối tro tơdroăng rêh ối; malối ôh tá xâu kơ-êng mâu tơdroăng ki hên ngế “tô tuăn rơhêng vâi ‘nâi” tung rêh ối pơlê pơla. Tơdroăng kơ-êng tiâ a rôh hôp hiăng ăm hlo hên tơdroăng kơ-êng tơdrăng tiâ tơdrăng tro ƀă hnoăng cheăng  dêi mâu ngế “pro kăn pơkuâ” mâu kơvâ cheăng vâ tah ki xơpá, tơvâ tơvân vâ mơnhông cheăng kâ-rêh ối. Tiâ a ngiâ Kuô̆k hô̆i, pôa Trần Hồng Hà, Ngế pro xiâm phŏ hnê ngăn Chin phuh tối nhên mâu troăng rơhlâ pơkuâ yă vâ pro tơniăn tơdroăng pơkâ séa ngăn liăn ôh tá ai yă drêng pêi pro luât pơhlêh liăn khế sap hâi lơ 1/7 kố ah.