Mâu kăn tối, Chin phuh, Ngế pro xiâm hnê ngăn Chin phuh hiăng tơmâng hnê mơhno, hên troăng rơhlâ pêi tơdrêng, pêi kơtăng vâ pêi tiô tơdroăng séa ngăn liăn ngân tơnêi têa. Tung mê, xo liăn ngân nâp ăm hngêi rak liăn hơnăm 2022 luâ tơdroăng tối hdrối 28%, xo ing mâu tơdroăng mơdró kâ dêi tơnêi têa, liăn ‘no pêi cheăng mơjiâng tơmeăm khoăng tơdrêng ing kong têa ê, cheăng kâ ing pa kong tê mơdró xuân châ luâ tơdroăng tối hdrối, pro tơdâng tơ’mô liăn ngân hrê pêi mâu tơdroăng pơkâ ‘mâi mơnhông cheăng kâ - rêh ối hơnăm 2022, rak tơniăn ƀă tơdâng tơ’mô kân ƀă tơdroăng cheăng kâ, kơdroh chĕn hnoăng ƀă kơxô̆ liăn hrê ki tro lŭp dêi liăn ngân.

Tối mơgei a rôh hôp, pôa Nguyễn Đức Hải, Kăn xiâm phŏ hnê ngăn Kuô̆k hô̆i pơkâ thế Chin phuh mơ-eăm tăng troăng tơkâ luâ mâu tơdroăng ki pá u ối, ki tơvâ tơvân, ôh tá rơkê tung rak ngăn, xúa liăn ngân môi tiah: Riân nôkố xo, hrê hdrối ôh tá tro nhên, tah ki hbrâ chêh hdrối, pơtroh liăn mơ’nui hơnăm hên lơ rế tâk, xuân ối ai tơdroăng ối chĕn nâp hnoăng mơhá, liăn ki pơklât thế nâp ‘na ki kố ki mê.

Xo liăn ngân vâ ‘no pêi cheăng mơjiâng tơmeăm khoăng tơnêi têa ối chĕn hâi tơvêh tung mơjiâng tơmeăm khoăng ki ối hên a mâu khu râ kong pơlê.