Ƀă dó inâi ‘’Việt Nam – Prôk vâ nhuô̆m pâ’’, rơpâu tơdroăng kơjo ‘na yă tê mơdró, liăn lăm ngăn a mâu kơpong, tíu ôm hyô, tíu tơdroăng ki mơnhông mơdêk - khôi túa lĕm kô châ xúa. Mâu khu tê mơdró xuân pơhlêh yă troh 50% ăm mâu tơdroăng mơdró rơxế pơto tơmối, tíu ối pơtê, kâ ôu, rak ngăn ivá...

Pakĭng mê, kong pơlê tơtrŏng tơdjêp tơmeăm, tíu troh, mơjiâng tơdroăng ôm hyô ki hên ngế hâk vâ troh, mơhnhôk mơjiâng pro tơmeăm tơbâ djâ khôi túa lĕm tro kong pơlê, ki má lối cho mâu tơmeăm OCOP. Pôa Trần Thanh Hoài, Phŏ Kăn pơkuâ Khu pơkuâ ‘na khôi túa lĕm – Tơ’noăng ivá ƀă Ôm hyô Lâm Đồng tối ăm ‘nâi, cho kuăn pơlê Lâm Đồng kô cho ‘’kăn teăng mâ ôm hyô’’, mơ-eăm djâ troh tơdroăng ki môi tuăn ăm tơmối ôm hyô, kum mơjiâng ivá rơdêi ăm ôm hyô tung pơla lâp tơnêi têa mot tung chal mơnhông nếo.