Leh tơbleăng kố châ tơkŭm po ƀă tơdroăng ki ‘no tơdrêng ing troăng hyôh internet tơdjêp a hên tíu ki mơ’no tung kong pơlê. Apoăng leh tơbleăng, kăn pơkuâ Vi ƀan Măt trâ̆n Tơnêi têa Việt Nam kong pơlê Lâm Đồng pơchuât rơkong krếo thế mâu kơ koan, tíu pêi cheăng, mâu khu tơrŭm cheăng kal kí rêh ối pơlê pơla mâu ngế ki tiô khôp, mâu khu mơdró kâ ƀă hên hĭn kăn ƀô̆, kong chưk, viên chưk, ngế pêi cheăng, khu lêng kring vế, đoân viên, hô̆i viên ƀă mâu rơxông kuăn pơlê tung kong pơlê mơdêk hiâm mơno tơrŭm, tŏng kum dêi rơpó, môi chip drêng kơklêa tơ’mô ƀă môi kơxuô drêng phâi rơtế tơdjuôm ivá tŏng gum kuăn pơlê mâu kong pơlê, pơlê kong kân peăng Kơnhŏng tro tơ’nhiê kế tơmeăm xua kong mê khía mơhot kân rôh má 3 plong mot.

Tơdrêng tung rôh leh tơbleăng, kong pơlê Lâm Đồng châ xo lối 20 rơtal liăn veăng gum. Tâi tâng kơxô̆ liăn ki kố kô châ pơtroh ăm Vi ƀan xiâm Măt trâ̆n Tơnêi têa Việt Nam vâ gum mâu rơpŏng kuăn pơlê mâu kong pơlê, pơlê kong kân peăng Kơnhŏng tro tơ’nhiê kế tơmeăm xua kong mê khía mơhot kân plong mot.