Leh Tơbâ hnoăng, ‘mé 16 kơxêng kiâ mâu mố đô̆i ki hlâ tơplâ nah châ rôu xo a kong têa Lếo ƀă Kul
Thứ sáu, 06:00, 07/06/2024
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV4.Xơ Đăng - Kơxo hâi lơ 6/6, a ilâng kiâ mâu ai hnoăng tơring tơkăng kong Ngọc Hồi, khu kăn Đảng kong pơlê, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n tơnêi têa Việt Nam kong pơlê Kon Tum hiăng tơkŭm po leh tơbâ hnoăng ƀă ‘mé 16 kơxêng kiâ mố đô̆i hlâ ai hnoăng ki lăm pleăng tơná, mâu ngế rơkê Việt Nam pleăng tơná hlâ tung mâu rôh tơplâ a kong têa Lếo ƀă Kul xua Đô̆i K53 kong pơlê Kon Tum rôu tăng xo tung rơnó tô mơdrăng kô nah.
Pơchuât tơdroăng chêh a rôh leh, jâ Y Ngọc, Kăn phŏ hnê ngăn Vi ƀan kuăn pơlê kong pơlê Kon Tum tối nhoăm pâ hơ-ui, mơjo ƀă mơnê hên pá kâi tối ƀă mâu ngế hlâ ai hnoăng, mâu ngế kuăn dêi hdroâng mơngế Việt Nam hiăng tơnôu tơplâ ta troh hlâ xua vâ pro tơleăng lĕm hdroâng mơngế ƀă tơdroăng tơrŭm ƀă mâu kong têa ê.
Tung 16 kơxêng kiâ mâu ngế hlâ ai hnoăng ki Đô̆i K53 kong pơlê Kon Tum rôu xo tơkŭm djâ vêh mê, ai 1 ngế hiăng ‘nâi inâi, cho Đoàn Thanh Long, kot mâ hơnă 1926, pơlê xiâm cheăm Điện Quang, tơring Điện Bàn, kong pơlê Quảng Nam. Khu pơkuâ ngăn kong pơlê Kon Tum kô pơcháu kơxêng kiâ vêh ăm rơpŏng hngêi ƀă mâu kăn a kong pơlê ki mê pro leh pôu ngăn, tơbâ hnoăng ƀă ‘mé.
Viết bình luận