Leh tơbleăng sầu riêng Krông Pač – Dak Lak roh má péa kô pro hâk vâ môi tuăn tơmối ƀă po kân tâ, hên tơdroăng ki má môi, kơnâ tâ’’, kố cho mơnhên dêi khu râ kăn pơkuâ tơring Krông Pač, kong pơlê Dak Lak a roh hôp tối tơbleăng ‘na Leh tơbleăng sầu riêng Krông Pač – Dak Lak roh má 2 hơnăm 2024 tơkŭm po kơxo lơ 18/7.

Dó inâi ‘’Sầu riêng Krông Pač - Mơnhông ƀă Mot tơrŭm’’, leh tơbleăng kô tơkŭm po sap hâi lơ 31/8 troh hâi lơ 2/9/2024. Jâ Ngô Thị Minh Trinh - Kăn phŏ hnê ngăn Vi ƀan tơring Krông Pač tối ăm ‘nâi: lâp tơring nôkố ai dâng 8 rơpâu hectar pêt plâi sầu riêng, châ 1/3 ƀăng deăng plâi sầu riêng dêi lâp kong pơlê Dak Lak.

Rơnó kố, tiô tối hdrối kơxô̆ plâi sầu riêng châ lối 92 rơpâu tâ̆n. Sầu riêng hiăng chiâng plâi pêt ki xiâm djâ pêi lo liăn ăm kuăn pơlê a tơring. Leh tơbleăng sầu riêng tơring Krông Pač roh má péa, po kân tâ, châ tơkŭm tơtro lĕm tâ, hên tơdroăng po ki kơnâ tâ kô pơtối pơ-ô mơngế pêt plâi sầu riêng ƀă mâu ki kơhnâ cheăng kâ ing plâi kâ kố djâ ăm.