Tơbleăng tối, mơ’no video ing mâu trang fanpage ki châ vâi loi tơngah, pơhlêh mơngiơk avatar tơná dế nôkố chiâng um mơngiơk prăng lơ pơhlêh avatar ƀă mâu um dêi Kăn xiâm pơkuâ hnê ngăn cheăng Đảng ƀă chêh mâu rơkong ki tơpui ki khéa hơ’nêng-mê cho túa ki hên ngế pơtroh tơdroăng sĭng khéa xua tơdroăng ki hlâ lêk dêi môi ngế tuăn mơno rơkê kân dêi Kăch măng Việt Nam tung măng xah hô̆i. Pin pâ pơchuât mâu tơdroăng ki chêh mê.

-Pâ nhuô̆m ƀă hơ-ui Meh ó khât, Meh hiăng pêi cheăng troh kơtê hiâm xua kuăn pơlê, xua tơnêi têa

-Châi heăng ó khât ngế kuăn ki rơkê dêi Đảng Kŏng san Việt Nam.

-Tơdroăng loi a Đảng cho ing túa ki lĕm tro dêi meh.

-Tơdroăng ki têm rơpiât ƀă rêh ối mơ’nhôp dêi châ ki Meh hiăng bro chiâng môi túa rêh ối lĕm tro khât ing mâ ngăn dêi kuăn pơlê.

-Tu ko a’nâi, tu dêi châ a châ Kăn xiâm pơkuâ hnê ngăn cheăng Đảng vâ ‘măn chôu tơdroăng loi tơngah, tơniăn lĕm ƀă tơdroăng lĕm tro tung la ngiâ ăm Tơnêi têa kơxo ah hmôi!

-Maluâ ƀă hên ngế, vâi ôh tá hlê khât chuh ngiah Kŏng san cho klâi la ngăn a kăn xiâm pơkuâ hnê ngăn Đảng, vâi hlê môi ngế kuăn mơngế kŏng san, môi túa rêh ối kŏng san gá môi tiah lâi.

Ƀă ối hên mâu ƀai thơ chêh lo têa mâ ing tuăn mơno ƀriê mơjo pâ. Hên ngế xuân tối mâu tơdroăng chôu vế ki tơviah drêng châ trâm pôa Nguyễn Phú Trọng - Kăn xiâm pơkuâ ngăn Đảng. Tung trang krê dêi tơná, pôa Vũ Quang Minh – Kăn teăng mâ Việt Nam a kong têa Alơmăng, xuân cho kăn teăng mâ Việt Nam a kong têa Kul ƀă a Ăng-glê, hlối cho teăng mâ a (Ai-len) Ireland hneăng hdrối tối, tơdroăng ki chôu vế drêng pôa châ chiân pôa Nguyễn Phú Trọng - Kăn xiâm pơkuâ hnê ngăn Đảng tung rôh lăm pôu păng ‘nâng dêi pôa troh a kong têa Kul a khế 7 hơnăm 2017.

-A  Sihanoukville, drêng hbrâ tăng tíu vâ tơkŭm po rôh trâm mâ dêi Kăn xiâm pơkuâ hnê ngăn Đảng ƀă nhŏng o ki pêi cheăng a Tíu xiâm kăn teăng mâ ƀă vâi krâ nhŏng o, Kăn xiâm pơkuâ hnê ngăn Đảng rĕng troh drêng nhŏng o dế ối miât tơmeăm. Kơdrâ ai Kăn xiâm pơkuâ hnê ngăn Đảng mot tung tíu ƀă rup kŏng, tông kơƀăng ƀă ngin tung tơdroăng ki ôh tá ƀĕng ê dêi tâi tâng rêm ngế.

-Ngin xuân tối ƀă dêi rơpó drêng chôu pâ troh tơdroăng ki ôh tá chiâng piu mê, rơhêng vâ ối ai hên rôh châ rơtế ƀă Pôa tông kơƀăng tơpui tơno hơniâp ro ƀă ngin tung môi rơpŏng hngêi”.

Ƀă ngế ki chêh hlá tơbeăng, ngê̆ nhân chế Hoàng Anh Sướng, péa xôh châ râm pôa Nguyễn Phú Trọng - Kăn xiâm pơkuâ hnê ngăn Đảng đi đo cho mâu tơdroăng ki chôu vế ôh tá la lâi piu, tung mê, ai rôh ôu chế tơdah pôa Tập Cận Bình, kăn xiâm pơkuâ hnê ngăn Đảng, Kăn hnê ngăn kong têa Sinuâ. Ngế chêh hlá tơbeăng, ngê̆ nhân chế Hoàng Anh Sướng chêh:

"Drêng pôa Tập Cận Bình - Kăn xiâm hnê ngăn Sinuâ troh pôu a Việt Nam, meh Nguyễn Phú Trọng hiăng krếo á tơkŭm po rôh ôu chế a kơxo má hâi lơ 13/11/2017a hngêi trá Pôa Hồ. Kố xuân cho rôh má 2 á châ trâm meh.

Xuân ƀă túa ki têm rơpiât, hmâ achê, hơniâp ro bro á hlo meh Nguyễn Phú Trọng môi tiah môi ngế thái ki rơkê hên tâ tâng vâ pơchông ƀă kăn xiâm pơkuâ tơdroăng kal kí. Xua ivá dêi meh hiăng bro rôh trâm mê pơla péa ngế xiâm pơkuâ péa tơnêi têa – Pôa Nguyễn Phú Trọng - Kăn xiâm pơkuâ hnê ngăn Đảng ƀă pô Tập Cận Bình - Kăn xiâm pơkuâ ngăn Đảng hmâ a chê, hơniâp ro, hơtôu, tơniăn.

Xua mê, xo ah hmôi, châ hlo mâu troăng hơlâ ki plâ mơdât kâ kơluâ dêi meh, á hâk mơnâ khât. Hmuâ tung dế túa ki têm rơpiât, choâ ‘lâng môi tiah ngế thái mê cho tá môi tơdroăng ki tơdrăng, rơdêi, kơtăng plâ mơdât kâ kơluâ, kâ kơhveăm, plâ mơdât mâu tơdroăng ‘mêi. Kuăn pơlê hâk vâ, loi nhuô̆m meh cho xua a mâu túa ki lĕm mê.

Ôh tá kâi tối tâi mâu hiâm mơno, mâu tơdroăng chôu vế ƀă hiâm mơno hâk vâ ki kuăn pơlê tối kơ pôa Nguyễn Phú Trọng - Kăn xiâm pơkuâ hnê ngăn Đảng, kăn pơkuâ châ kuăn pơlê hâk nhuô̆m, mâu vâi pú tung lâp plâi tơnêi nhuô̆m; môi túa hiâm mơno tơmiât kân, ngăn “Tơdroăng ki tro ‘ló cho tơdroăng ki tĭng, kơnía git khât”, rak vế túa pơkâ, rêh ối plâ rơxông xua tơnêi têa, xua kuăn pơlê.

Môi plâi nuih hiăng ôh tá chiâng i hiâm xếo, lối rơtuh plâi nuih lo têa mâ khéa hơ’nêng.