Mâu kăn mâu kong têa, mâu kăn pơkuâ hnê ngăn Đảng rơkâu mâu hnoăng hiăng châ pêi pro ki kân, tơƀrê tung mơnhông, mơjiâng tơnêi têa ƀă kuăn mơngế Việt Nam ing Kăn xiâm dêi Đảng Kŏng sản Việt Nam pơkuâ,  ki xiâm pơkuâ cho pôa Nguyễn Phú Trọng - Kăn xiâm pơkuâ hnê ngăn Đảng; mơhno ki pơtối rơtế ƀă Kăn xiâm pơkuâ hnê ngăn Đảng mơdêk tơrŭm cheăng pơla péa pâ ôh tá la lâi pơtê mơnhông. Kăn xiâm pơkuâ hnê ngăn Đảng, Kăn xiâm hnê ngăn kong têa Lếo pôa Thongloun Sisoulith tối nhên, pôa Nguyễn Phú Trọng - Kăn xiâm pơkuâ hnê ngăn Đảng “tơmâng khât ƀă veăng ‘no hnoăng kơhnâ pêi mâu tơdroăng mơnhông tơrŭm cheăng ki kân, tơrŭm môi tuăn malối tơrŭm tâi tâng pơla péa Đảng, péa tơnêi têa ƀă kuăn pơlê péa tơnêi têa Lếo - Việt Nam, rak tơdroăng hmâ pêi ki lĕm tro ton nah ăm đi đo lĕm, plâ rơxông tơniăn”.

Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ, mê pôa Tập Cận Bình  tối “ngăn nhoăm khât tơrŭm cheăng pơla Sinuâ- Việt Nam, hbrâ vâ rơtế ƀă pôa Nguyễn Phú Trọng - Kăn xiâm pơkuâ hnê ngăn Đảng pơtối tơpui tơno mâu troăng rơhlâ, troăng vâ mơjiâng kuăn pơlê tối tơdroăng tung la ngiâ dêi Sinuâ - Việt Nam rế tơrŭm trâu hlối krá tâ’’.