
Tung hên hâi hdrối kố nah, pôa Rơčom Reng ối a pơlê kong kơdrâm Pleiku, kong pơlê Gia Lai rêh ối tung tuăn ngoâ sĭng khéa, khíu mơjo, drêng tâi tâng 126 rơtuh liăn cho kơxô̆ liăn tê kơphế dêi rơpŏng hngêi pôa hiăng tro khu ‘mêi hêak pơloi tong tâi ƀlêk bú tung to lâi phut tê. Pôa hơ’muăn, a peăng kơxêi mơ’nui khế 3/2025, pôa tâng krếo phôn ing môi ngế tối dêi tơná cho ngế cheăng ngăn ‘na on tơhrik, tối thế nâp liăn on tơhrik ƀă lông thế pôa nâp ăm tơdrêng tung phôn tiô troăng hyôh măng vâ “tơ’lêi hlâu ƀă hlối pơkí tâ há”.
Loi khât xua tâng rơkong tơpui pơkâ hnê thế pêi pro nhên ti kô ti mê, pôa hiăng pro tiô ngế ki mê hnê mê cho hiăng gum kiâ ‘mâi châ pơkuâ ngăn tài khoản ƀă xo kâ tâi kơxô̆ liăn tung mê:
“Vâi tối thế xo phôn o mê (kuăn kơdrâi pôa Reng) hnê thế tải app peăng khu ngăn on tơhrik. ‘Na kơmăi tơná a mê quay video, hnê nhên tơdroăng nâp liăn on tơhrik mê thế pro ti kô ti mê. Klêi mê xup mơnhên ngiâ a, quét mã QR. Klêi mê kuăn kơdrâi á séa ngăn a Tài khoản, hiăng hía tâi 126 rơtuh liăn, ôh tá ai xếo hí môi liăn”.

Sap apoăng hơnăm troh nôkố, lâp tung kong pơlê Gia Lai hiăng tối ai 14 rôh troh khu ‘mêi hêak pơloi ing măng internet ƀă tâi tâng kơxô̆ liăn tâi lối 12,9 rơtal liăn. Krê to tơdroăng hêak pơloi vâi tối tơná mơngế pêi cheăng ‘na kơvâ ngăn on tơhrik hiăng ai 6 ngế tro hlôp hiăng lăm tơbleăng tối ăm râ kăn, lŭp vâ chê 400 rơtuh liăn. Tiô riân ngăn dêi ƀơrô Kring tơniăn măng ƀă ƀơrô, plâ mơdât mâu ki ‘mêi xúa kŏng ngê̆ ki nếo - Kŏng an kong pơlê Gia Lai, ai 3/4 ngế cho kơdrâi hiăng tro khu ‘mêi pơlông, ƀă ai 1/3 ngế hiăng hlôp tro khu ‘mêi pơlông mê ối a pơlê kong kơdrâm Pleiku.
Tâi tâng mâu tơdroăng mê cho pơxiâm ing măng pơlê pơla, ki hên cho ung mâu tài khoăn ki hêak pơloi tung Facebook ing tơdroăng ki vâi hêak pơloi tơbleăng tơmeăm, pơlông djâ ‘no liăn pêi cheăng ‘nâ hía hêak pơloi tối cho pú hmâ nhŏng o, kơ koan khu râ pơkuâ cheăng. Môi tơdroăng ki ê nếo pro tơdroăng séa ngăn chiâng pá puât tâ ki hên mâu tài khoản hngêi rak liăn xo liăn hêak pơloi mê cho tài khoản khu mơdró. La tài khoản mê vâi hmâ mung lơ rôe ƀă hlá mơ-éa ki oh tá xê khât, hêak pơloi, chiâng pá vâ tăng séa ngăn mơdât tơmeăm, malối drêng kơxô̆ liăn tro pơtroh ăm kong têa ê bú tung tolâi phut tê.
Nôkố mâu kŏng an kong pơlê hiăng tơrŭm ƀă mâu hngêi rak liăn ngân ki kân môi tiah Vietcombank, BIDV, MBBank… vâ mơnhên tài khoản ki nhôm mê, rak pơtân ‘nôi liăn ƀă kơjo kum vêh xo nếo kơxô̆ liăn ki lŭp. Kơnôm ing mê, tung hơnăm 2024 ƀă apoăng hơnăm 2025, hiăng rak ƀă tơvêh lối 10 rơtal liăn ing mâu ki hêak pơloi môi tiah mê. Laga, xuân ối hên tơdroăng ki pá tung pơla tơrŭm tăng séa ngăn, malối ƀă mâu hngêi rak liăn kong pơlê ki ê.
Thiê̆u tă Phạm Học - Kăn ƀô̆ séa ngăn dêi Ƀơrô Kring tơniăn măng ƀă Hbrâ mơdât mâu ki xôi ‘na xúa kơmăi ki lĕm nếo nôkố - Kŏng an kong pơlê Dak Lak ăm ‘nâi:
“Tâng mâu kuăn pơlê ki lâi ngăn tuăn tơmiât pro xâu, oh tá hmiân, pơtroh liăn hên, pơtroh ƀă kơxô̆ liăn ki hên, ngin pơkâ thế mâu hngêi rak liăn teăm mơdât, tối tơbleăng ăm kuăn pơlê ‘nâi, pakĭng mê thế kơ-êng kăn ƀô̆ ƀơrô vâ tối nhên ƀă teăm mơdât. Laga, ai mâu hngêi rak liăn kong pơlê ki ê, tơdroăng vâ tơrŭm tăng séa ngăn ăm ‘nâi mâu tơdroăng pêi pro ối hrá, pro pá tung tơdroăng séa ngăn vâ ‘nâi xiâm liăn, bă tăng mơngế”.

Ƀơrô Kring tơniăn ƀă Hbrâ mơdât mâu ngế ai xôi xúa kŏng ngê̆ ki dâi lĕm nếo - Kŏng an kong pơlê Gia Lai hnê tối kuăn pơlê thế chôu pâ tơdroăng “4 ôh-4 thế ” môi tiah khiâ tât vâ kring vế dêi tơná pôi ta tro khu ‘mêi ki xúa kŏng ngê̆ hêak pơloi. 4 ôh mê cho: ôh tá pro tiô mơngế ki tơviah hnê pêi pro tung phôn lơ tung măng pơlê pơla; Ôh tá pro hmâ ƀă mơngế ki tơviah tung măng pơlê pơla, lơ tung Facebook.
Pôi tá rơhăm rĕng loi vâi krếo khĕn lơ tơbleăng pêi cheăng hiâ la liăn khế kâ hên, lơ vâi pơlông veăng ‘no liăn pêi ki kố ki mê châ liăn rơkâ hên; pôi tá loi, pôi tá ăm vâi ‘nâi tơdroăng ki kal krê tơtá, tài khoản tơná, mã OTP, lơ krếo ƀă video drêng tá hâi kơnó nhên ngiâ méa, inâi, thế hbrâ rơnáu đi đo.
4 thế pêi pro, mê cho: Thế mơnhên tơdroăng ki vâi thế pơtroh liăn mê, mơhé vâ nôu pâ lơ nhŏng o xiâm tơná; Thế hbrâ rơnáu drêng mot tung măng xah hô̆i, tơpui tơno ƀă mơngế ki tơviah; Thế tối ăm kŏng an lơ nôu pâ nhŏng o xiâm, nhŏng o ki ê ‘nâi tâng nhôm tro vâi hêak pơloi; Thế tăng ‘nâi nhên hdrối vâ ‘no liăn pêi cheăng kâ lơ pơtroh liăn tơdrêng tung troăng hyôh măng.
Thươ̆ng tá Đinh Văn Sơn - Phŏ pơkuâ Ƀơrô pơkuâ kring tơniăn tung măng ƀă hbrâ mơdât mâu ki ai xôi xúa kŏng ngê̆ ki nếo, Kŏng an kong pơlê Gia Lai ăm ‘nâi: Tăng ‘nâi nhên hdrối vâ ‘no:
“Ngin pơtối tăng ‘nâi plĕng ăm ngế pơkuâ kŏng an kong pơlê ai mâu tơdroăng cheăng vâ pêi, pơkâ tơdroăng cheăng, hnê mơhno mâu tíu pêi cheăng a kong pơlê malối cho kŏng an cheăm bêng pơtối pêi tro hnoăng cheăng tăng ‘nâi plĕng mâu tơdroăng vâ teăm châ ‘nâi. Pakĭng mê, ngin đi đo tăng ‘nâi mâu tơdroăng ki mâu khu ‘mêi vâ hnê ăm kuăn pơlê vâ kuăn pơlê teăm ‘nâi, hbrâ mơdât, tơrŭm ƀă mâu khu râ kơvâ cheăng kŏng an tung kong pơlê pin ƀă kong pơlê ki ê vâ tơplâ tăng rup mâu ki ai xôi xúa kŏng ngê̆ nếo nôkố; ƀă pâ thế ai mâu tơmeăm ki xúa dâi lĕm tiô túa nếo nôkố vâ tơplâ mơdât châ tơƀrê ƀă mâu ki ai xôi mê”.
Tung pơla tơdroăng pêi pro xúa kŏng ngê̆ ki nếo mơnhông tơƀrê tơrêm hâi, pakĭng tơdroăng tối tơbleăng hdrối, tí tăng ngăn dêi mâu kơ koan, mê tơdroăng hlê plĕng ƀă hbrâ rơnáu ing tơrêm ngế kuăn pơlê cho khiâ tât ki vâ kring vế tơná ƀă rơpŏng hngêi pôi tá tro hlôp khu ki ai xôi tung măng pơlông.
Viết bình luận