Châ ‘nâi tơdroăng ki pôa Nguyễn Phú Trọng, Kăn xiâm pơkuâ ngăn Tíu xiâm Đảng Kŏng san Việt Nam hlâ, Khu pơkuâ ngăn Tíu xiâm Đảng Nhân dân kăch mạng Lếo, Kuô̆k hô̆i tơnêi têa Kŏng hòa Yân chuh Nhân yân Lếo, Kăn xiâm hnê ngăn tơnêi têa Kŏng hoa Yân chủ Nhân yân Lếo, Chin phuh tơnêi têa Kŏng hòa Yân chủ Nhân yân Lếo; Khu pơkuâ ngăn Tíu xiâm Đảng Kŏng san Sinuâ ƀă Kuăn pơlê Sinuâ; pôa Hun Sen - Kăn xiâm hnê ngăn Đảng Nhân yân Kul; pôa Hun Manet, Ngế pro xiâm hnê ngăn kong têa Kul; pôa Khuon Sodary - Kăn xiâm hnê ngăn Kuô̆k hô̆i Kul; Đăi tươ̆ng Raúl Castro Ruz, Kăn xiâm pơkuâ hnê ngăn cheăng Đảng má môi Khu pơkuâ ngăn Tíu xiâm Đảng Kŏng san Cuba; pôa Miguel Díaz Canel-Bermúdez - Kăn xiâm hnê ngăn tơnêi têa Kŏng hòa Cuba; pôa Vladimir Putin - Kăn xiâm pơkuâ kong têa Rusi, jâ Valentina Matvienko - kăn xiâm hnê ngăn Hô̆i đong liên bang Kuô̆k hô̆i kong têa Rusi (Kuô̆k hô̆i râ má môi Rusi), pôa Vyacheslav Volodin - Kăn xiâm hnê ngăn Duma Tơnêi têa Kuô̆k hô̆i kong têa Rusi (Kuô̆k hô̆i râ má péa) hiăng pơtroh kơthô veăng sĭng khéa troh Khu pơkuâ ngăn tíu xiâm Đảng Kŏng san Việt Nam; Kuô̆k hô̆i tơnêi têa Kŏng hoa xah hô̆i chuh ngiah Việt Nam; Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, Chin phuh tơnêi têa Kŏng hòa xah hô̆i chuh ngiah Việt Nam, Vi ƀan xiâm Măt trâ̆n Tơnêi têa Việt Nam ƀă Kuăn pơlê Việt Nam.

Tơdroăng chêh tung kơthô mơhno hiâm mơno mơjo pâ pá kâi tối  drêng tâng tối pôa Nguyễn Phú Trọng, Kăn xiâm pơkuâ hnê ngăn Đảng  Kŏng sản Việt Nam hiăng hlâ a hâi lơ 19/7/2024.

Mâu kơthô pơtroh, hơlêm ai chêh: Pôa Nguyễn Phú Trọng kơtê i hiâm, Đảng, Tơnêi têa ƀă Kuăn pơlê Việt Nam hía môi ngế kăn xiâm kăch măng ki môi môi tuăn tơdrăng lĕm. Tung plâ rơxông pôa pêi cheăng ăm kăch măng, pôa hiăng pleăng tâi ivá ƀă tuăn ngôa rơkê tơná ăm tơdroăng cheăng ki kal tung tơdroăng pro tơleăng lĕm hdroâng mơngế, pro ăm lâp tơnêi têa tơrŭm môi ƀă tung tơdroăng pơhlêh nếo dêi Đảng Kŏng sản Việt Nam, malối tơdroăng mơjiâng, ‘mâi rơnêu Đảng xông rơdêi, tơdrăng lĕm, xuân môi tiah tơdroăng hbrâ mơdât kâ kơluâ, pro ôh tá tro, mơnhông djâ tơnêi têa Việt Nam xông tơƀrê, mơdêk ki rế rơdêi dêi Việt Nam tung lâp plâi tơnêi ƀă tung kơpong. Pôa cho ngế kăn ki ki rơkê má môi dêi cha nôkố.