Ƀă kuăn pơlê mâu hdroâng kuăn ngo a cheăm Ayun, tơring Chư Sê, kong pơlê Gia Lai, pôa Nguyễn Phú Trọng - Kăn xiâm pơkuâ ngăn Đảng ôh tá xê to ngế ki pơkuâ hnê plâ rơxông xua tơnêi têa xua kuăn pơlê, mê ối cho ngế ki hiăng gum ăm kuăn pơlê ai tơdroăng rêh ối phât tơtô.

Tung rôh lăm pêi cheăng a Gia Lai khế 4/2017. Pôa Nguyễn Phú Trọng - Kăn xiâm pơkuâ hnê ngăn Đảng hiăng lăm pôu cheăm Ayun, môi to cheăm ki kơtiê ó a tơring Chư Sê. Tơmâng tơdroăng tơpui tối púi vâ dêi kuăn pơlê vâ ai rơchôa vâ toh báu klâng, toh loăng plâi, Kăn xiâm pơkuâ ngăn Đảng hiăng hnê mơhno thế kong pơlê tơkŭm ivá liăn ngân rĕng pro rơchôa Plei Keo.

Péa hơnăm kơ’nâi mê, rơchôa Plei Keo hiăng pro kêi ƀă hiăng ai têa rơngiâp ing kroăng Ayun mot djâ têa troh tung ƀăng klâng pro ăm kuăn pơlê ai hmê kâ phâi tơtô. Ai rơchôa Plei Keo, kuăn pơlê cheăm Ayun hiăng mơdâ pêt lối 300 héctar báu pêi 2 rơnó, tơniăn ai hmê kâ phâi. Pôa Đinh Miơch, krâ pơlê, pơlê A Chông, nhuô̆m git tơmeăm ki pôa Nguyễn Phú Trọng - Kăn xiâm hnê ngăn Đảng ăm kuăn pơlê ối a cheăm Ayun.

“Kuăn pơlê phiu ro klêi pôa Nguyễn Phú Trọng - Kăn xiâm pơkuâ hnê ngăn Đảng hnê mơhno ăm kuăn pơlê gum kuăn pơlê ai Rơchôa mê tơdroăng rêh ối dêi kuăn pơlê chôa mơnhông tơƀrê. Ngin kô chôu pâ đi đo ta ah hnoăng dêi Pôa hiăng gum ăm kuăn pơlê Ayun  nôkố ƀă tung xo ah hmôi”.

*** Lối 10 hơnăm hdrối, a hâi lơ 17/3/2014, pôa Nguyễn Phú Trọng, Kăn xiâm pơkuâ hnê ngăn Đảng ƀă Khu kăn ki pêi dêi hnoăng cheăng Tơnêi têa hiăng troh pôu vâi krâ nhŏng o mâu hdroâng kuăn ngo cheăm Hồng Hạ, tơring A Lưới, kong pơlê Thừa Thiên Huế, lăm ngăn tơdroăng ki mơjiâng thôn pơlê nếo, hơhlêh pêt mâu hdrê loăng, păn mơnăn, xut tah hrâ mơnguâ kơtiê xơpá.

Kăn xiâm pơkuâ tơpui ƀă vâi krâ nhŏng o akố, Kăn xiâm pơkuâ hnê ngăn Đảng pơchân tối Đảng ƀô̆, kuăn pơlê tung cheăm pơtối mơdêk khôi hmâ ngoh khên tơnôu, mơjiâng pơlê cheăm rế hía rế kro mơdrŏng lĕm, mơ-eăm hluăn ing kơtiê. Pôa Hồ Viết Lương, Kăn hnê ngăn Vi ƀan cheăm Hồng Hạ chôu pâ: Hâi ki mê nah, tá khu kăn pơkuâ cheăm, vâi krâ nhŏng o tung cheăm tâng tơdroăng ki kăn xiâm pơkuâ hnê ngăn Đảng troh pôu pơrá phiu ro khât.

“Vâi krâ nhŏng o kuăn pơlê môi tiah á kố pâ má môi cho rơkong tơpui dêi Kăn xiâm pơkuâ hnê ngăn Đảng cho Kuăn pơlê Hồng Hạ mơdêk khôi hmâ pơlê cheăm khên tơnôu, tơrŭm mơjiâng tơdroăng rêh ối phâi hơtô hơniâp ro. Mơ-eăm hluăn ing kơtiê, kơbố xuân athế mơ-eăm hên tâ. Kăn xiâm hnê ngăn Đảng hía lôi, vâi krâ nhŏng o khéa ó khât. Hâi hnah, a kuât xua Kăn xiâm hnê ngăn Đảng diâp, kuăn pơlê djâ dêi rơpó mơgrúa lĕm, trâm dêi rơpó tơbâ troh Kăn xiâm hnê ngăn Đảng ƀă ôh tá la lâi piu pâ mơnê troh pôa”.

*** Tâng tối pôa Nguyễn Phú Trọng Kăn xiâm pơkuâ ngăn Đảng  hiăng hlâ, kuăn pơlê hdroâng kuăn ngo Khmer a tơbăng kroăng Cửu Long  mơhno hiâm mơno pâ khât ƀă mơjo pâ kơ pôa - Ngế kăn xiâm ki rơkê dêi kuăn pơlê. Tung tơdroăng hơ’muăn dêi tơná, pôa Thạch Sinh, ngế cheăng tung Khu rak ngăn hngêi chuô Lò Gạch, cheăm Lương Hòa, tơring Châu Thành, kong pơlê Trà vinh ôh tá pơtê pơ-eăng Kăn xiâm pơkuâ ngăn Đảng, cho ngế ki đi đo tơmâng khât  troh tơdroăng rêh ối dêi hdroâng kuăn ngo tối tơdjuôm ƀă kuăn ngo Khmer tối krê.

Tung pơla pro Kăn xiâm pơkuâ hnê ngăn, pôa Nguyễn Phú Trọng hiăng pơkâ hên troăng rơhlâ, luât pơkâ vâ mơnhông tơƀrê, kơdroh ki pá puât tung rêh ối pơla mâu kuăn ngo, pơla mâu kơpong ki kố ki tá. Kơnôm ing mê kơpong hdroâng kuăn ngo hiăng kâi pơhlêh xông tơƀrê tâ tâng vâ pơchông ƀă mâu hơnăm hdrối. Pôa Thạch Sinh tối:

“Drêng trâng tối pôa Nguyễn Phú Trọng - Kăn xiâm pơkuâ ngăn Đảng hiăng hlâ, á cho môi ngế kuăn ngo Khmer, rêh ối tung khu mơngế tung tơnêi têa Việt Nam a mơjo pâ khât kơ pôa. Tung 3 hneăng pro Kăn xiâm pơkuâ hnê ngăn Đảng, hlo la lâi pôa xuân nhuô̆m troh hnoăng ki pơxúa dêi mâu kuăn ngo. Klêi mê, pôa pro kơtăng tơdroăng plâ mơdât kâ kơluâ vâ ăm Đảng ƀă mâu kăn ƀô̆ krúa lĕm, a hơ-ui mơjo pâ khât. A tơngah cho Kăn hnê ngăn tơngi ngiâ kô ah xuân ai luât pơkâ tŏng gum môi tiah pôa Nguyễn Phú Trọng vâ kring vế tơniăn ăm mâu hdroâng kuăn ngo, pêi cheăng tơƀrê kum ăm kuăn pơlê kro mơdrŏng hlối rế rơdêi tâ’’.