Tung 2 rôh lăm pôu, pêi cheăng a kong pơlê Kon Tum a hơnăm 2011 ƀă hơnăm 2017, pôa Nguyễn Phú Trọng - Kăn xiâm pơkuâ hnê ngăn Đảng xuân mơdoh hâi chôu lăm pôu, tăng ‘nâi plĕng tơdroăng rêh ối, tơmâng tơdroăng púi vâ dêi kuăn pơlê hdroâng kuăn ngo. Tơdroăng pêi cheăng chôa lâng, mơngế têm rơpiêt, hmâ achê, mâu rơkong ki Kăn xiâm pơkuâ hnê ngăn Đảng kơ-êng, hnê pơchân đi đo châ kuăn pơlê Kon Tum chôu pâ. Pôa A Bát, ối a thôn Kon Rờ Bàng 2, cheăm Vinh Quang, pơlê kong kơdrâm Kon Tum, rơrêk tung hiâm mơno tối:

“Hơnăm 2017 kuăn pơlê châ trâm pôa Nguyễn Phú Trọng - Kăn xiâm pơkuâ hnê ngăn Đảng a kố, krâ pơlê ăm kơ pôa môi plâ ếo kuăn ngo dêi pơlê. Kăn xiâm pơkuâ hnê ngăn Đảng, koh tơpui kơ-êng kuăn pơlê, Pôa tơrup kŏng ƀă tơrêm ngế, hlối pơchân kuăn pơlê thế mơ-eăm pêi cheăng kâ pôi tơmâng loi khu ‘mêi pơlông djâ pro tơdroăng ôh tá tro. Tơmâng tiô pôa Nguyễn Phú Trọng hnê kuăn pơlê Kon Rờ Bàng môi tuăn ƀă dêi rơpó, kum dêi rơpó, nôkô pơlê ngin hiăng mơnhông pơ’lêh hên. Drêng tâng tối pôa hlâ ngin khéa hơ’nêng, ngế ki lâi xuân khíu pâ, ngế ki lâi xuân vâ krôu’’.

Cho ngế ai tơdroăng ki loi tơngah tung pơlê pơla mơngế Rơđế hên xôh veăng mâu tơdroăng pêi mơhno khôi túa lĕm tro a pơlê kong xiâm Hà Nội, ngê̆ nhân ưu tú Pôa Pâ H’Loan, ối a ƀuôn Akŏ Dhông, bêng Tân Lợi, pơlê kong kơdrâm Ƀuôn Ma Thuột, kong pơlê Dak Lak tối, pôa Nguyễn Phú Trọng, Kăn xiâm pơkuâ hnê ngăn Đảng cho kăn pơkuâ ôh tá kơtăn, đi đo achê, tơmâng tơdroăng tơpui tối pói vâ dêi kuăn pơlê.

Kơnôm mâu troăng pơkâ pêi tơtro dêi Tơnêi têa ƀă tơdroăng hnê mơhno dêi Kăn xiâm pơkuâ hnê ngăn Đảng, kơpong kong ngo, tơkăng kong, kơpong hdroâng kuăn ngo hiăng pơhlêh, mơnhông hluâ pơkâ. Pôa pâ H’Loan - Krâ pơlê tối:

‘’Xo hiâm mơno ki pâ mơjo mê, mê á tơkâ hluâ mâu tơdroăng pá puât tiô troăng hnê mơhno dêi Đảng, dêi Tơnêi têa, tung mê ai rơkong dêi pôa Nguyễn Phú Trọng, Kăn xiâm pơkuâ hnê ngăn Đảng. Krê á ối rêh, á thế pơchân tối kuăn pơlê, pơchân tối kuăn cháu, mơ-eăm mơjiâng ăm Tây Nguyên kro mơdrŏng, veăng gum mơjiâng tơnêi têa tơtro tâ, lĕm tâ’’.

Drêng tâng tối pôa Nguyễn Phú Trọng - Kăn xiâm pơkuâ hnê ngăn Đảng hlâ, kuăn pơlê mâu kuăn ngo cheăm Quảng Tâm, tơring Tuy Đức, kong pơlê Dak Nông mơjo pâ. Chôu pâ rơkong Kăn xiâm pơkuâ hnê ngăn Đảng hnê pơchân, mơhnhôk kuăn pơlê tung rôh lăm pôu a cheăm Quảng Tâm kơtăn nókố châ 12 hơnăm hdrối nah, kuăn pơlê a rêm pơlê đi đo môi tuăn dêi rơpó, loi khât kơ hnoăng pơkuâ hnê mơhno dêi Đảng, Tơnêi têa, rơtế tơrŭm ivá mơjiâng dêi pơlê xiâm tơná rế ton rế kro mơdrŏng. Ngoh Điểu Ngót, kuăn ngo M’Nông, Kăn pơkuâ hnê ngăn Đoân Droh rơtăm Kŏng sản Hồ Chí Minh cheăm Quảng Tâm, tơring Tuy Đức, kong pơlê Dak Nông, tối:

“Tâng tối Kăn xiâm pơkuâ hnê ngăn Đảng hiăng hlâ, rơxông hơnăm ối nếo tung cheăm mơjo pâ kơ pôa, ngế Kăn hnê ngăn ki rơkê, ai tuăn chân tơnôu, kơhnâ pêi cheăng xua tơnêi têa xua kuăn pơlê, pôa đi đo mơhno hiâm mơno dêi tơná pâ kơ mâu rơxông ối nếo ƀă mâu kơpong hơngế hơngo. Ngin, mâu rơxông ối nếo đi đo chôu pâ rơkong Kăn xiâm pơkuâ hnê ngăn Đảng hnê pơchân, thế đi đo pơtối râk ki môi tuăn, môi mơno, loi nhoăm khât a hnoăng pơkuâ hnê mơhno dêi Đảng, Tơnêi têa. Ngin kô mơ-eăm hriâm, mơ-eăm pêi cheăng kâ, mơnhông pêi chiâk, ‘no ivá mơjiâng dêi pơlê xiâm tơná, tơnêi têa rế ton rế kro mơdrŏng lĕm”.