Tôh kơphô̆ 8, bêng Tân Tiến, pơlê kong kơdrâm Ƀuôn Ma Thuột, kong pơlê Dak Lak ai 62 ngế đảng viên. Jâ Vũ Thị Huê, Kăn hnê ngăn chi ƀô̆ ăm ‘nâi: sap hơnăm 2019 troh nôkố, rêm hơnăm chi ƀô̆ tơ’mot sap 2 troh 3 ngế đảng viên. Krê tơdế apoăng hơnăm 2024 hiăng tơ’mot 3 ngế mot đảng viên. Mâu đảng viên nếo ki hriâm sap râ má pái tơngi klêng, ai tuăn ngôa hiăng chân krá, hơnăm nối nếo. 5 hơnăm hlối, chi ƀô̆ châ Đảng ƀô̆ bêng Tân Tiến ối má to lâi chi ƀô̆ pê klêi hnoăng cheăng pơcháu. Jâ Vũ Thị Huê tối:

‘’Ngin pơcháu kơxô̆ pơkâ ăm 7 khu a tôh kơphô̆, rêm khu thế tơ’mot môi ngế châ mot Đảng. Mâu vâi o đoân viên vâi mơ-eăm  mê ngin séa ngăn. Ngăn tâng hlo hôm kô chêh inâi ăm lăm hriâm lâm hnê ‘na Đảng klêi mê ah tơ’mot’’.

Ngoh Phan Thành Tiến cho đảng viên hơnăm ối nếo châ mot đảng a chi ƀô̆ tôh dân phô̆ 8 apoăng khế 5/2024 kô nah. Ngoh Tiến tối ăm ‘nâi,  sap ing ối sinh viên hiăng tăng ‘nâi plĕng ‘na luât Đảng ƀă kô mơ-eăm  vâ châ mot Đảng. Drêng hiăng klêi hriâm đăi hok lăm pêi cheăng a bêng Tân Tiến, ngoh pơtối mơ-eăm, hriâm, đi đo pê klêi tŭm tơdroăng cheăng châ pơcháu, kơhnâ veăng pêi tơdroăng cheăng a pơlê cheăm bêng. Hâi lơ 8/5 kố nah, ngoh hâk tơngăm cho 1 tung 2 ngế hơnăm ối nếo châ mot Đảng. Ngoh Tiến tối:

“Tung pơla pêi cheăng a kơ koan, á xuân tơmâng pêi pro tro pơkâ dêi luât, ƀă mơ-eăm ôh tá la lâi pơtê tung tơdroăng cheăng. Sap ing mê, kăn pơkuâ kơ koan pro tơ’lêi hlâu ăm lăm hriâm ‘na tơdroăng cheăng Đảng, ƀă troh khế 5/2024 a hâk  mơnê ‘nâng hiăng châ mot Đảng”. 

Đảng ƀô̆ bêng Tân Tiến, pơlê kong kơdrâm Ƀuôn Ma Thuột nôkố ai 587 ngế đảng viên, hmâ tơkŭm hôp a  20 chi ƀô̆ đảng a cheăm bêng, tung mê ai 13 chi ƀô̆ tôh dân phô̆, 4  chi ƀô̆ hngêi trung ƀă mâu chi ƀô̆ kŏng an, lêng, khu ngăn pơkeăng pơlât. Tung mâu hơnăm hdrối, Đảng ƀô̆ bêng đi đo pê klêi tơdroăng cheăng mơnhông vâ tơ’mot mâu ngế mot đảng viên hơnăm ối nếo, ƀă châ Đảng ƀô̆ pơlê kong kơdrâm Ƀuôn Ma Thuột khĕn kơdeăn cho Đảng ƀô̆ rơdêi tung tŭm tơdroăng.

Tiô pôa Nguyễn Đình Ninh - Kăn hnê ngăn Đảng ủy bêng Tân Tiến, ‘nâi nhên tơdroăng tơ’mot mơngế hơnăm ối nếo mot Đảng cho hnoăng cheăng pêi ki kal, Đảng ủy bêng hiăng xoăng hnoăng cheăng pêi ăm tơrêm chi ủy tung tơdroăng cheăng mê. Mâu chi ủy thế mơjiâng pơkâ nhên tung rah xo, ăm lăm hriâm vâ hlê. Mâu chi ƀô̆ xuân pê klêi tơdroăng  pơkâ pơcháu, thăm nếo hên chi ƀô̆ ối pêi luâ tơdroăng pơcháu.

Pôa Nguyễn Đình Ninh tối ‘na mâu tơdroăng hmâ pêi cheăng, hnê tơ’nôm ƀă tơ’mot mơngế hơnăm ối nếo mot đảng viên a Đảng ƀô̆ bêng Tân Tiến tung pơla nôkố.

"Mâu ngế ki lâi hiăng klêi hriâm tơdroăng cheăng vêh troh a pơlê ta hâi ai cheăng pêi, ngin kô ăm vâi cheăng tung khu lêng kuăn pơlê kring gak pơlê lơ ăm mot tung đoân viên droh rơtăm vâ séa ngăn, veăng gum mâu ki mê, vâ vâi mơ-eăm mot tung khu pêi tơdroăng  dêi pơlê. Ing mê, ngin kô rah ngế ki lâi kơhnâ ai tuăm mơ-eăm , đoân viên ki kơhnâ, ai tuăn lĕm kô ăm lăm hriâm vâ mot Đảng”.

Ki khât ăm hlo, tơdroăng tơ’mot mot đảng viên a bêng Tân Tiến, pơlê kong kơdrâm Ƀuôn Ma Thuột hiăng châ pêi tơdrêng, tơƀrê. Ing mê, pơtối rak hnoăng cheăng xiâm dêi chi ƀô̆ a cheăm bêng, veăng mơnhông cheăng  kâ - rêh ối pơlê pơla ƀă mơjiâng Đảng ƀô̆ bêng Tân Tiến rế ton rế krá rơdêi tung tŭm tơdroăng.