A hneăng hôp, kăn teăng mâ châ tơmâng ngế tơbleăng tơdroăng tối mâu tơdroăng tơdjâk troh tơkăng kong tơnêi têa ƀă mâu tơdroăng ki ai a mâu troăng tơkăng kong, kơpong têa kơxĭ tung rơxông nôkố; rak vế kong prâi tung tơdroăng gô̆m xok ki mơ’no lo pakong, mơdât xok chá ki mơ’no lo pakong ƀă kơlía mơ’no lo pakong; mâu tơdroăng ‘na mơnhông hnoăng mơngế hơnăm hiăng krâ tung hneăng nếo.

Mâu kăn teăng mâ xuân tơpui tơno, tối ăm dêi pó túa ki rơkê tơtro tung tơdroăng pêi cheăng khu, troăng pơtâng tối ƀă mơnhông hnoăng dêi khu tung rak vế kong prâi ƀă tơkăng kong; tơdroăng pêi, troăng pêi rơkê dêi mâu tíu cheăng tung tơdroăng rak vế kong prâi, tơkăng kong a mâu kong pơlê. Hneăng hôp vâ mơdêk hnoăng cheăng, tơdroăng ki hlê plĕng ƀă veăng dêi mơngế hơnăm hiăng krâ tung tơdroăng rak vế kong prâi ƀă tơkăng kong, têa kơxĭ rơlố. Ing mê, rêm ngế hơnăm hiăng krâ kô djâ troăng ahdrối, mơdêk hnoăng cheăng “hơnăm hiăng krâ djâ troăng ahdrối”.