Pôa Y Luyện Niê Kdăm, kăn Kuô̆k hô̆i hneăng X, xuân cho kăn pơkuâ hnê ngăn cheăng Đảng Dak Lak hneăng hdrối tối, mâu tơdroăng pêi dêi pôa Nguyễn Phú Trọng, kăn xiâm pơkuâ hnê ngăn cheăng Đảng pơrá châ kuăn pơlê loi, kuăn pơlê vâ, kuăn pơlê hâk.

“Pôa prôk lêk cho tơdroăng ki hía lôi môi ngế kuăn kơhnâ rơkê dêi Đảng, dêi Tơnêi têa dêi kuăn pơlê. Kăn xiâm pơkuâ hnê ngăn cheăng Đảng hiăng lăm pôu kong pơlê Dak Lak, pôa tơmâng khât troh tơdroăng rêh ối cheăng kâ dêi hdroâng kuăn ngo, tơdroăng rêh ối pơlê pơla, tơdroăng cheăng dêi kuăn pơlê, mê cho tơdroăng ki tơmâng ngăn má môi”.

Hâk phiu ƀă hâk tơngăm drêng 2 xôh châ trâm ƀă xup um ƀă pôa Nguyễn Phú Trọng, kăn xiâm pơkuâ hnê ngăn cheăng Đảng a mâu rôh po tơdroăng dêi Khu tơrŭm mâu Hô̆i văn hok ngê̆ thuât Việt Nam, pôa Nguyễn Hồng Chiến, a bêng Tân Thành, pơlê kong kơdrâm Ƀuôn Ma Thuột, kong pơlê Dak Lak, hâk vâ khât ƀă túa ki pơkuâ vâ hmâ achê, têm, troăng tơpui rơkê, choâ ‘lâng. Pôa tối, rêm rơkong tơpui, tối dêi kăn xiâm pơkuâ hnê ngăn cheăng Đảng tơ’lêi mot tung hiâm mơno, ƀă pôa chôu vế đi đo:

“Rơkong hnê pơchân ki tro ‘ló má môi troh nôkố á tơmiât ƀă ngế ki râng loăng chêh chêh văn, chêh hlá tơbeăng tối krê ƀă kuăn pơlê tối tơdjuôm, mê cho rơkong tơpui “Kơdê kơnái pôi tá ăm kơ’lo tơhneăng. Bro tiah la châ kơdê kơnái la kơ’lo reăng ôh tá tơhneăng. Tơkéa vâ tối cho athế rak ăm gá châ tơniăn”. Ngế râng loăng chêh xuân athế hriâm ƀă pêi tiô trối  rơkong hnê dêi Kăn xiâm pơkuâ hnê ngăn cheăng Đảng, pro tiah lâi pin kâi mơdât tơdroăng ki ôh tá tro la athế pro pơxúa troăng tơmiât ăm kuăn pơlê ki loi khât a Đảng, ƀă troăng tŏng kum tơniăn lĕm dêi pin”.

Chôu vế rơkong hnê pơchân dêi pôa Nguyễn Phú Trọng, Kăn xiâm pơkuâ hnê ngăn cheăng Đảng a Hneăng hôp khu kăn lâp tơnêi têa Khu Droh rơtăm Kŏng san Hồ Chí Minh rôh má XII, nâ H’Hương Ƀuôn Krông, kăn pơkuâ ngăn Droh rơtăm pơlê kong kơdrâm Ƀuôn Ma Thuột, kong pơlê Dak Lak xo mê pro ivá vâ hriâm xêh ăm dêi tơná. Malối cho djâ troăng ahdrối tung tơdroăng ki hriâm ƀối túa rêh ối kăch măng; djâ troăng ahdrối tung hriâm tâp, hriâm pât dêi hiâm mơno, tung pêi cheăng, tung tơmiât; djâ troăng ahdrối tung pêi pro hnoăng cheăng kal kí:

“Mê cho ivá vâ á pơtối hriâm tâp ƀă pêi tô túa rêh ối hiâm mơno Hồ Chí Minh ƀă mâu túa rêh ối dêi Kăn xiâm pơkuâ hnê ngăn cheăng Đảng. Hriâm a meh tơdroăng ki têm rơpiât, hriâm tâp tơdroăng ki kơhnâ, kơdĭng, tơdrăng, hiâm mơno lĕm. Pơtối hriâm tâp mâu túa rêh ối lĕm, ôh tá xâu pá ƀă mơ-eăm vâ mơjiâng môi ivá khên tơnôu kal kí krá rơdêi, a hiâm mơno krúa, tuăn ngo rơkê, túa  tơmiât kân”.