Pơtối mê, vâ pêi pro ƀlêi trâng mâu pơkâ pêi plah, pơkâ pêi dêi hnoăng mơnhông cheăng kâ – rêh ối pơlê pơla hơnăm 2024, tơdrêng amê pro tơdroăng châi chiâng tơdroăng pêi pro hdrối tơdroăng ki kơtê i hiâm dêi pôa Nguyễn Phú Trọng, Kăn xiâm pơkuâ hnê ngăn Đảng, Ngế pro xiâm hnê ngăn Chin phuh pơkâ mâu ngế xiâm, kăn xiâm pơkuâ kơ koan râ xiâm, kơ koan ối tung Chin phuh, kăn hnê ngăn Vi ƀan mâu kong pơlê, pơlê kong kơdrâm ối tung Tơnêi têa pơtối tơkŭm tơpui tơno teăm tơdrêng tah lôi pá puât ăm kuăn pơlê ƀă khu tê mơdró: Khu xiâm pơkuâ liăn ngân pêi pro châ tơƀrê mâu troăng hơlâ pro mơdon ton hâi  khế nâp hnoăng mơhá, xúa tơnêi, kơdroh xo hnoăng mơhá tơmeăm to kơnâ, kơdroh kơxô̆ liăn mơ’no cheăng, kơxô̆ liăn hiăng châ tơbleăng ăm pêi pro; thâ hriăn plĕng mâu ki tơdjâk, pêi kêi đeăng, pơkâ Chin phuh Pơkâ ‘na kơlo xo hnoăng liăn hdrối ƀă ô tô mơjiâng, krâ pro tung tơnêi têa tung khế 7/2024.

Mâu khu xiâm, kơ koan, kong pơlê hlê plĕng pêi pro, ngăn mơ’no liăn cheăng tơnêi têa cho môi hnoăng cheăng kal kí ki xiâm; pêi tiô pơkâ pêi pro, pơkâ mơ’no liăn ngân i nhên rêm tơdroăng tơkêa bro vâ tơkŭm hnê mơhno kơtăng tâ nếo tung po rơdâ pêi pro mâu tơdroăng pơkâ xiâm tơnêi têa.