Mơdêk hnoăng cheăng pêi, pơtối rak vế pêi pro hnoăng cheăng dêi ngế pơkuâ tung khu kăn, hnê mơhno ƀă tơkŭm pêi; “tơpui pêi, ôh tá ton tơrŏng’’; đi đo séa ngăn, mơhnhôk, teăm tơdrêng rĕng châ ‘nâi  ƀă tah xơpá, tơvâ tơvân ki nếo ‘nâi tung tơdroăng tơkêa bro, malối mâu tơdroăng tơkêa bro ki xiâm; ki phá xêh tung hnoăng cheăng pêi dêi rêm ngế; ngăn tơdroăng ăm ‘nâi ăm liăn ngân cho môi tung mâu tơdroăng ki kal vâ tối kơlo ki pê klêi tơdroăng cheăng rêm hơnăm dêi khu, dêi mâu ngế ki tơdjâk troh.

Séa ngăn nhên ing tơdroăng hbrâ tơdroăng tơkêa bro, pơcháu liăn vâ pêi troh tơdroăng vê hdró, tăng mơngế pêi, pêi pro hlá mơ-eá vâ xo liăn... ƀă tơrêm tơdroăng tơkêa bro. Khu xiâm ngăn troăng prôk  tối, mâu khu xiâm, kơvâ cheăng, kong pơlê tơkŭm tơbleăng mâu tơdroăng tơkêa bro ki kal dêi tơnêi têa, pơla mâu kơpong rơtế ƀă Rôh tơ’noăng “500 hâi măng mơ-eăm vâ ti lâi, mơ-eăm kân, tơ’noăng pê klêi  tơdroăng tơkêa bro troăng prôk ki tơdrăng lĕm”.