Tiô tối tơbleăng dêi Khu xiâm tối tơbleăng tơdroăng kal tiô troăng hyôh um tơvi, rơ’jiu, internet, pơhlêh kơxô̆ châ mơdêk rơdêi tiô troăng tâi tâng kuăn pơlê, tŭm têk, ai tơƀrê pơxúa, veăng gum kơhnâ tung tơdroăng ki mơnhông cheăng kâ rêh ối pơlê pơla tơnêi têa.

Cheăng kâ kơxô̆, pơlê pơla kơxô̆ pơtối mơnhông rơdêi, kế tơmeăm kơxô̆ dêi khu mơdró kâ Việt Nam pơtối châ mơjiâng bro ƀă châ tê ngi mâu kong têa tung lâp plâi tơnêi. Tơpui mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa tơmâng xo, khĕn kơdeăn ƀă mơnhên tối khât mâu ivá mơ-eăm ƀă mâu tơdroăng ki châ pêi tơƀrê dêi mâu khu xiâm, kơvâ cheăng, kong pơlê.

Ngế pro xiâm hnê ngăn tơnêi têa tối nhên, nôkố ôh “tá pơkâ tíu”, nếo mê athế “mơdêk rơdêi”, “mơnhông tơƀrê” rơtế ƀă ivá pêi pro rơdêi. Mơdêk môi tuăn hlê plĕng djâ troăng ahdrối; Mơdêk pêi klêi troăng hơlâ tŏng gum, vâ mơdêk pơhlêh kơxô̆, tơtro ƀă tơdroăng pơkâ lâp plâi tơnêi; mơnhông cheăng kâ kơxô̆, pơlê pơla kơxô̆, kuăn pơlê kơxô̆.