Kơtăn kố ai 30 hơnăm, mâu rôh kơneăng dêi Tơƀai tơnêi têa Việt Nam hiăng kơneăng tơdrăng ing Pơlê kong kân Hồ Chí Minh troh pơlê kong xiâm Seoul, Hàn Quốc. Troh nôkố, khu tơƀai kố hăng ai 6 to troăng kơneăng tơdrăng cho Hà Nội, Pơlê kong kân Hồ Chí Minh – Seoul; Hà Nội, Pơlê kong kân Hồ Chí Minh – Busan; Đà Nẵng – Seoul ƀă Cam Ranh – Seoul, ƀă ki kơneăng tâk troh 112 rôh rêm măng tĭng.

Tơpui a rôh po tơdroăng, pôa Phạm Minh Chính, Ngế pro xiâm hnê ngăn tơnêi têa tối nhên klêi lối 30 hơnăm mơjiâng tơrŭm Việt Nam – Hàn Quốc mơnhông tơniăn lĕm, cho kong têa tơrŭm cheăng tung la ngâ tŭm têk dêi rơpó, ƀă 5 tíu ki xiâm, loi ‘na tơdroăng kal kí, tơrŭm kuăn mơngế, mot tơrŭm ‘na cheăng kâ, bô bối ‘na túa lĕm tro, rơtế tơdjuôm tơdroăng ki rơhêng vâ mơjiâng tơnêi têa rơdêi, kro mơdrŏng, kuăn pơlê hơniâp, phâi hơtôu.