Pơtối hneăng hôp má 7, kơxo kố lơ 4/6, Kuô̆k hô̆i pơxiâm hôp kơ-êng ƀă tiâ mơnhên mâu rơkong kơ-êng dêi mâu kăn Kuô̆k hô̆i. Po tung 2 hâi tơdế, rôh hôp kơ-êng tơkŭm tung 4 tơdroăng ối tung kơvâ. Kong kế tơmeăm khoăng tung têa a tơnêi ƀă hyôh kong prâi, Cheăng kơmăi kơmok tê mơdró, Séa ngăn liăn ngân, Túa lĕm tro – Tơ’noăng ivá ƀă Ôm hyô.

Tiô tơdroăng dêi rôh hôp kơxo kố, pôa Đặng Quốc Khánh, Ngế xiâm ngăn tơmeăm khoăng tung têa a tơnêi ƀă hyô kong prâi kô cho ngế ki apoăng mơđah tơbleăng rơkong tiâ mơnhên. Rôh apoăng châ rah xo tiâ mơnhên a ngiâ Kuô̆k hô̆i, pôa Đặng Quốc Khánh, ngế xiâm ngăn ‘na tơmeăm khoăng tung têa a tơnêi ƀă hyôh kong prâi kô pêi pro nhên ‘na tơdroăng pơkuâ ngăn, chiâ xo, rak vế kong kế tơmeăm khoăng tung têa kơxĭ dêi tơnêi têa.

Tơdrêng amê kô cho tơdroăng ki pêi pro troăng hơlâ, luât ‘na gâk kring kơnhŏng têa; troăng hơlâ hbrâ ví, tăng têa tôh ăm mâu kế tơmeăm tung rơnó tôu mơdrăng, mơdât têa xăng po lân mot, kơdroh, ‘mêi ăm kơnhŏng têa. Troăng hơlâ hriăn ngăn, tăng ‘nâi, chiâ tăng, xúa têa, tơmeăm khoăng pro tơmeăm ki vâ mơjiâng bro ƀă kong kế tung têa a tơnêi, tơmeăm ki kơnía git.