Pôa Nông Việt Yên - Kăn pơkuâ hnê ngăn Đảng tơring Mù Cang Chải tối ăm ‘nâi: Khế 6/2019, Khu kăn pơkuâ hnê ngăn Đảng Mù Cang Chải mơhnhôk thế ƀă pơkâ pêi pro túa cheăng “Hâi mơ’nui măng tĭng rơtế ƀă kuăn pơlê” cho vâ thăm mơdêk tơrŭm cheăng ki tiah hmâ pơla mâu kăn ƀô̆, đảng viên ƀă kuăn pơlê, mơdât ƀă tah lôi mâu tơdroăng ki mâu kăn ƀô̆ hlo dêi tơná pro kăn nhăng pro pơkrip, mơnhôm, hơngế ing kuăn pơlê, klêi mê, mơjiâng túa cheăng “Hbrâ  rơnáu, tăng tơdroăng vâ trâm, tơpui tơno ƀă kuăn pơlê, hmâng kuăn pơlê, tâi ta hiâm tuăn xua kuăn pơlê, tâi ivá vâ gum ăm kuăn pơlê”.

Tiah mê, rêm ngế kăn ƀô̆, đảng viên pakĭng tơdroăng ki lăm pêi cheăng troh a kuăn pơlê tiô hnoăng cheăng mê rêm khế athế mơdoh dêi chôu phut, hâi khế, hnoăng cheăng, ki vâ iâ hlái mơdoh 2 hâi mơ’nui măng tĭng vâ lăm troh a kuăn pơlê a mâu thôn, pơlê ki hiăng châ xing xoăng, pơkuâ ngăn vâ hnê mơhno tối ‘na troăng tơdjâ tiô troăng hơlâ dêi Đảng, túa pơkâ, luât dêi Tơnêi têa; veăng gum kuăn pơlê mơnhông pêi cheăng kâ, kơdroh tah kơklêa, xăm kơtiê xahpá; thăm mơdêk vâ hbrâ mơdât mâu tơdroăng ki tơtrâ ‘nhiê Đảng, Tơnêi têa, tơdroăng ki hbrâ mơdât mê pro tro tơrêm ngế kuăn pơlê; tí tăng ‘nâi tơdroăng, ‘nâi klê ‘na tuăn mơno, hiâm pói vâ dêi kuăn pơlê, rơtế ƀă kuăn pơlê kơdroh tah lôi ki xahpá, ki ối tơvâ tơvân tung rêh ối, hiâm tuăn, tơdroăng pêi chiâk pêi deăng ƀă hên hĕng mâu tơdroăng ki ê.

“Tiô tơdroăng pơkâ troh a hơnăm 2030 Mù Cang Chải ôh ta xê to tơring ki kơtiê, ngin mơnhên tối, “Hâi mơ’nui măng tĭng rơtế ƀă kuăn pơlê” rế cho hnoăng cheăng, rế cho troăng hơlâ ki pơhlêh nếo. Ki ê nếo, mê cho tíu ki vâ ăm Khu hnê mơhno dêi Khu pơkuâ hnê ngăn Đảng ƀô̆ tơring hnê pơtâp ƀă séa mơnhên ngăn kăn ƀô̆. Ki má pái, xo ki mê vâ pro xiâm vâ mơnhên tối hnoăng ki djâ troăng dêi kăn ƀô̆, pro ti lâi vâ mơjiâng chiâng tơdroăng ki hmâ, tơdrêng, tơrŭm krá kâk ó tâ nêó pơla kăn ƀô̆, đảng viên ƀă kuăn pơlê”.

Klêi kơ’nâi 5 hơnăm rak vế, pêi pro tiô túa cheăng “Hâi mơ’nui măng tĭng rơtế ƀă kuăn pơlê”, ai vâ chê 30.000 ngế kăn ƀô̆, đảng viên, mâu ngế ki cheăng; lối  90 rơpâu ngế kuăn pơlê hiăng veăng pêi pro mâu hnoăng cheăng, hnoăng ki u ối kal athế châ mơnhên, tŏng gum a pơlê, tôh kơphô̆. Klêi kơ’nâi vêh rơnêu bro mê, hiăng châ toh ƀê tong a lối 300km troăng prôk thôn pơlê ƀă po nếo lối 62 km troăng tơnêi; tơkŭm lối 25.500 roh hnê tối ‘na troăng tơdjâ, troăng pơkâ, tơdroăng hnê tối dêi Đảng, troăng mơ’no, luât dêi Tơnêi têa; mơnhông pêi cheăng kâ - rêh ối pơlê pơla, hbrâ, mơdât tơdroăng châi tamo; hbrâ mơdât tơdroăng ki pro xôi a pơlê pơla.

Mâu tơdroăng cheăng ki kố hiăng veăng gum ăm ngiâ méa thôn pơlê a Mù Cang Chải rế hiá rế mơnhông châ tơƀrê khât; tơdroăng ki pêi lo liăn rêm ngế a hơnăm 2023 châ 34 rơtuh liăn/ngế, tâk châ 70% tâng vâ pơchông ngăn ƀă hneăng apoăng nah. Tâng vâ riân ngăn sap ing apoăng hneăng troh nôkố, rêm hơnăm tơring pơrá kơdroh châ lối 9% kơxô̆ rơpŏng kơtiê, ing mê, kơxô̆ rơpŏng kơtiê dêi lâp tơring chu ối 38,45%. Jâ Giàng Thị Khua, mơngế kuăn pơlê a cheăm Hồ Bốn, tơring Mù Cang Chải hơniâp ro tối ăm ‘nâi:

“Rêm ngế hâk vâ khât ‘nâng xua kơdrâm mơngế mê ga xuân rơdêi tâ tâng vâ pơchông ngăn ƀă môi ngế pêi; ki rơhêng vâ tối, troăng ki vâ mot tung hngêi á xuân châ mâu kăn ƀô̆ veăng lo pêi, tŏng gum. Pơla kuăn pơlê ƀă mâu kăn ƀô̆ hiăng thăm rế châ achê dêi pó hên tâ”.

Ing tơná chu troh a pơlê cheăm rơtế ƀă kuăn pơlê a khế mơ’nui hơnăm, pôa Đỗ Đức Duy, Kăn pơkuâ hnê ngăn Đảng kong pơlê Yên Bái ai tối: Mâu khế mơ’nui hơnăm 2019, klêi kơ’nâi Khu hnê mơhno dêi Đảng uỷ tơring Mù Cang Chải ai tối tơbleăng ‘na mâu tơdroăng tơmiêt ki apoăng tung túa cheăng “hâi mơ’nui măng tiưng rơtế ƀă kuăn pơlê”; ăm hlo kố cho túa cheăng ki hnê mơhnhôk kuăn pơlê châ tơƀrê, chiâng pêi pro kơhnâ khât, tơtro ƀă tơdroăng ki ai păng ‘nâng, Khu hnê mơhno cheăng dêi Khu pơkuâ hnê ngăn Đảng Yên Bái hiăng vâ môi tuăn rah xo tơring Mù Cang Chải pro khu ki djâ troăng ahdrối, klêi mê, tí tăng ‘nâi plĕng xiâm kối, hnối po rơdâ pêi ro tung tâi tâng Đảng ƀô̆ dêi kong pơlê.

Klêi kơ’nâi vâ chê 5 hơnăm rak vế, pêi pro mâu tơdroăng pơkâ dêi Khu hnê mơhno cheăng Đảng, Tơdroăng “hâi mơ’nui măng ting rơtế ƀă kuăn pơlê” hiăng mơhnhôk kơdrâm kơdrĕng mâu kăn ƀô̆, đảng viên ƀă kuăn pơlê ing tơdroăng ki ing tơná, mơhnŏng pleăng xêh hnoăng cheăng, ôh ta pêi pro vâ mơhno krip to pa kong, tiô kơ tơdroăng ki xo hnoăng ki mơhá tê. Mê, khu kăn ƀô̆, đảng viên ôh tá xâu, ôh tá kho, ôh tá xâu tơdroăng, vâi hiăng rơtế dêi pó pêi pro tơdroăng cheăng: pro mơgrúa tơnêi tíu, gô̆m tah văng xok, mơjiâng pro hngêi túa lĕm tro, pro troăng prôk thôn pơlê, veăng gum kuăn pơlê mơnhông pêi cheăng kâ, rêh ối kơtiê xahpá.

“Ngin pơtối mơgêi tơdroăng cheăng, vêh mơnhên ngăn, po rơdâ mâu túa cheăng, pơ-ô ƀă hnê tơdjâ tơdroăng ki rơkê dêi mâu ngế ki cheăng kơhnâ rơkê, mâu túa pei pro tro, rơkê, ai pơxúa hnối rak vế pêi pro tiô troăng Hriâm tâp ƀă  pêi pro tiô hiâm mơno, tuăn tơmiêt, túa cheăng Hồ Chí Minh. Kố cho hnoăng cheăng ki pêi pro đi đo, pơtối, xuân cho môi tung mâu túa cheăng ki khu kăn pơkuâ hnê ngăn Đảng, tơdrêng amê, cho môi tung mâu túa cheăng ki vâ pêi pro dêi hnoăng tơná ki djâ troăng ahdrối, hnoăng tơdjâ troăng dêi kăn ƀô̆, đảng viên tung mâu tơdroăng cheăng a pơlê pơla, athế ƀă kuăn pơlê”.

Ki tơƀrê dêi tuá cheăng “Hâi mơ’nui măng tĭng ƀă kuăn pơlê” hiăng ƀă dế veăng gum ai pơxúa kân khât vâ Mù Cang Chải thâ rĕng pêi pro klêi mâu hnoăng cheăng ki Tơdroăng pơkâ hneăng hop Đảng ƀô̆ dêi kong pơlê ƀă Tơdroăng pơkâ dêi hneăng hôp kân Đảng ƀô̆ tơring, hneăng hơnăm 2020-2025 hiăng mơ’no, djâ kong pơlê rĕng chiâng tơring ki ôm hyô, tíu ki tro dêi “Khôi túa-vêa vong, tơniăn ƀă achê nhŏng o” dêi kong pơlê ƀă lâp tơnêi têa; troh a hơnăm 2025 tơring kố hiăng châ lo ing inâi ki tơring kơtiê ƀă krá kâk tiô troăng hơlâ ki pơhlêh nếo, tơrŭm tơrôa ƀă mơnhông.