Tơpui a rôh hôp, pôa Lương Cường, kăn pơkuâ hnê ngăn Đảng tối nhên, bu ối lối môi hơnăm nếo cho mơgêi hnoăng cheăng 13 dêi Đảng, xua mê, Khu pơkuâ cheăng Tơnêi têa kal kơdo mơ-eăm, pêi pro kơtăng tâ, tơƀrê tâ nếo vâ veăng kum pêi pro ƀlêi chiâng mâu hnoăng cheăng ‘na tung tơnêi têa, hbrâ mơdât kâ kơluâ, ƀă hơ’lêh chêh pro luât tiô Pơkâ Hneăng hôp 13 dêi Đảng. Athế pơtối pêi pro tro hnoăng cheăng tí tăng ‘nâi plĕng plâ mơdât tơdroăng ki kâ kơluâ liăn ngân, tro ƀă tơdroăng tơbleăng tro Pơkâ 144 dêi Khu xiâm pơkuâ tơdroăng kal kí ‘na tơdroăng ki tro ‘ló tiô hiâm mơno dêi kăn ƀô̆, đảng viên tung hneăng ki nếo.

Rơtế a mê, pơtối tí tăng ‘nâi plĕng pơkâ tơleăng klêi mâu tơdroăng ki kâ kơluâ tơdjâk troh kăn ƀô̆, đảng viên, kum hnoăng cheăng Hneăng hôp đảng rêm râ.