A roh tơdah, pôa Lương Tam Quang kheăn kơdeăn hnoăng, tơdroăng veăng kum dêi ngế krê Kăn teăng mâ tung tơdroăng mơdêk tơrŭm cheăng pơla Australia - Việt Nam, ki rơhêng vâ tối cho tơdroăng mơdêk tơrŭm cheăng péa tơnêi têa to Khu tơrŭm cheăng ton xŏn klăng roh lăm pôu pêi cheăng kong têa Australia dêi pôa Phạm Minh Chính, Ngế pro xiâm hnê ngăn tơnêi têa a khế 3 pơla kố nah.

Vâ pơtối mơdêk tơrŭm cheăng pơla Khu xiâm pơkuâ Kŏng an ƀă mâu kơ koan pêi pro luât Australia, pôa Lương Tam Quang pơkâ thế péa pâ pơtối rak pêi pro, po rơdâ tơrŭm cheăng tiô mâu mơ-éa tơrŭm cheăng hiăng kĭ tơkêa; pơtối hriăn plĕng tơpui tơno môi tuăn tơrŭm tung kơvâ gâk kring ƀă hbrâ, mơdât mâu ngế xôi kŏng ngê̆ rơxông nếo.

Pơtối tối tơbleăng ăm dêi pó tơdroăng ‘na mâu ngế xôi ai khu pú hên lâp tơnêi têa, pơkuâ tơdroăng mot lo tung tơnêi têa, tối ăm dêi pó tơdroăng ‘na hbrâ mơdât mot lo tung tơnêi têa ƀă xĕn ối ôh tá tro luât mơnhâu gâk kring tơnêi têa rêm tơnêi têa.