Tung kơdrum hngêi trung rơdâ 11 ha, hngêi trung Hoàng Việt châ hbrâ rơnáu mâu tơmeăm ki dâi lĕm tiô túa nếo, lối 400 ngế kăn ƀô̆, thái cô ƀă mâu ngế pêi cheăng tung hngêi trung dế hnê, rak ngăn dâng 3 rơpâu 400 ngế ngế hok tro ing râ má môi troh râ má péa lo ing 20 to kong pơlê, pơlê kong kân tung lâp tơnêi têa.

Tơbleăng a rôh pêi cheăng, Ngế pro xiâm phŏ hnê ngăn tơnêi têa tối mâ ngăn mâu tơdroăng vâ pêi pro dêi kong pơlê Dak Lak tung pêi pro tiô troăng hơlâ dêi Đảng, Tơnêi têa ‘na ‘no liăn hnê hriâm, púi vâ mâu kăn kong pơlê, kơvâ cheăng hnê hriâm xuân môi tiah mâu thái cô ƀă hok tro hngêi trung Hoàng Việt pơtối rak vế pêi pro tro mâu tơdroăng hiăng pêi rơhéa, đi đo kơdôu mơ-eăm hnê tơbrê tung tŭm tơdroăng ăm hok tro.

Rôh kố, pôa Nguyễn Hòa Bình, Ngế pro xiâm phŏ hnê ngăn Chin phuh hiăng diâp tơmeăm tơbâ ƀă hbru tơmeăm Trung thu ăm mâu vâi o hok tro hngêi trung Hoàng Việt. Hdrối mê, kơmăng hâi lơ 14/9, pôa Nguyễn Hòa Bình hiăng veăng xah hêi Trung thu “On tơdrong bâ eăng tơdroăng púi vâ ‘’ a Dak Lak, ăm 1 rơpâu 700 kơxu tơmeăm mê cho hnoăng liăn hriâm, rơxế mái ƀă tơmeăm Trung thu gum ăm mâu vâi o kơtiê xơpá.