Klêi kơ’nâi hmâng rơkong tơpui tối pâ thế dêi Khu xiâm ngăn kong pơlê, hnoăng cheăng dêi mâu kăn ƀô̆ ƀă mâu khu xiâm, kơvâ cheăng ki ai tơdjâk troh, mơgêi rôh pêi cheăng, pôa Nguyễn Hòa Bình, Ngế pro xiâm phŏ hnê ngăn tơnêi têa má môi tối nhên Khu xiâm ngăn kong pơlê ƀă hnoăng cheăng dêi mâu kăn ƀô̆ ai hnoăng cheăng kal khât, pơkuâ mâu tơdroăng cho ‘na kơ koan tơnêi têa, ƀiên chê̆, kuăn mơngế, liăn ngân ƀă hên ki ê cho mâu tơdroăng ki tơdjâk troh ki rơkê plĕng hnoăng cheăng dêi tơnêi têa, tơdjâk troh hên tơdroăng ki kân dêi Đảng.

Ngế pro xiâm phŏ hnê ngăn tơnêi têa má môi pơkâ thế Khu xiâm ngăn kong pơlê ƀă hnoăng cheăng dêi mâu kăn ƀô̆ tơkŭm pro klêi Tơdroăng pơkâ mơgêi 20 hơnăm pêi pro túa tơkŭm kơ koan dêi Chin phuh pro tíu mơjiâng tơdroăng pơkâ khu tơrŭm Chin phuh hneăng 16 pơla hơnăm 2026 – 2031.