Kơxê hâi lơ 4/6, Kuô̆k hô̆i pơtối kơ-êng ƀă tiâ tơdroăng kơ-êng ƀă kơvâ cheăng tê mơdró. Mâu kăn Kuô̆k hô̆i pâ thế pôa Nguyễn Hồng Diên, Ngế xiâm ngăn tê mơdró tối nhên mâu troăng rơhlâ vâ kơdroh xơpá, mơdât mâu ngế ki pro xôi vâ mơjiâng tơdroăng tê mơdró tung điê̆n tưh, mâu luât pơkâ tŏng kum ƀă tah ki xơpá ăm khu mơdró, ‘mâi mơnhông pêi cheăng kâ pro kế tơmeăm.

Pôa Nguyễn Hồng Diên, Ngế xiâm ngăn tê mơdró ăm ‘nâi: mâu hơnăm hdrối mê hía nah, tơdroăng tê mơdró tung điê̆n tưh a Việt Nam pơtối mơnhông rơdêi a kơlo ki tâk riân sap 20-25% rêm hơnăm, Việt Nam châ pơxá ối khu má 5 to kong têa ki pêi cheăng pê lo liăn kế tơmeăm hên  ối má môi tung lâp plâi tơnêi; tơdroăng tê mơdró ƀă điê̆n tưh tâk lối 20 rơtal dollars Mih.

 Ngế xiâm ngăn tê mơdró ăm ‘nâi hiăng tơmâng pêi pro tơdrêng hên troăng rơhlâ mơnhông ki tơƀrê tung tơdroăng rak ngăn, séa mơnhên, kring vế mơngế rôe xúa môi tiah pê klêi luât pơkâ tŏng kum, tăng ngăn, mơjiâng luât tơdah xoƀă tiâ kơ mơngế ki rôe xúa tơmeăm, tah lôi tơdroăng chêh tê mơdró tơmeăm ôh tá tro luât tung tơdroăng tê mơdró kơxô̆.

‘Na rak ngăn tơdroăng tê mơdró tung măng xah hô̆i, Khu xiâm ngăn tê mơdró kô pơkuâ tơrŭm  ƀă mâu kơ koan ki ai tơdjâk troh séa ngăn, tăng ngăn ƀă pơxâu mâu ki pro xôi; ăm mâu cheăng rak ngăn tê mơdró kring gak vâ châ ‘nâi, tơplâ mơdât, pro mơnhên mâu ki lâi pro xôi.