Cho ngế ki ối a ko Chin phuh, pôa Phạm Minh Chính, Ngế pro xiâm hnê ngăn Chin phuh ƀriê tối, pôa hâk tơngăm khât ƀă ai tơdroăng ki ro kân drêng châ pêi cheăng ƀă kăn xiâm pơkuâ ngăn Đảng Nguyễn Phú Trọng tung plâ 8 hơnăm ƀă chê 8 khế, tung hnoăng cheăng ki pơra phá dêi rơpó; Ngế cheăng Khu xiâm kal kí, Khu kăn pơkuâ hnê ngăn Đảng, Ngế xiâm pơkuâ Khu tơrŭm tíu xiâm Tơnêi têa, Ngế xiâm Rak vế, rak ngăn ivá kăn ƀô̆ tơnêi têa troh Ngế pro xiâm hnê ngăn Chin phuh:

“Á hâk tơngăm khât ƀă châ hơniâp ro kân drêng châ pêi cheăng ƀă pôa Nguyễn Phú Trọng - Kăn xiâm pơkuâ hnê ngăn Đảng, ing rôh pêi cheăng ƀă tơdroăng tŏng gum, bro tơ’lêi hlâu tơmâng ngăn dêi pôa á hlo a pôa mơhno mâu tơdroăng ki xiâm a kơ’nâi kố. Má môi, pôa cho môi ngế kăn pơkuâ kơhnâ rơkê xua tơdroăng mơjiâng môi tơnêi têa ó rơdêi, kro mơdrŏng ƀă kuăn pơlê châ hơniâp ro phâi hơtôu ƀă châ kuăn pơlê loi nhuô̆m ôh ti xê to tung tơnêi têa, tung kơpong, mê ối tá tung lâp plâi tơnêi”.

*Drêng ối rêh nah, pôa Nguyễn Phú Trọng, Kăn xiâm pơkuâ hnê ngăn Đảng tơmâng troh tơdroăng mơnhông dêi pơlê kong kân Hồ Chí Minh, mê tiô rơkong dêi Kăn xiâm pơkuâ hnê ngăn Đảng kố cho ‘’môi tíu cheăng ton xŏn ki kal. Sap ing pôu râng hnoăng cheăng ngế ối a ko dêi Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng ai 15 xôh lăm pôu ƀă pêi cheăng a pơlê kong kân ai inâi Pôa.

Roh lăm pôu pêi cheăng má mơ’nui dêi pôa Nguyễn Phú Trọng, Kăn xiâm pơkuâ hnê ngăn Đảng a hâi lơ 23/9/2022, tro roh leh tơbâ 77 hơnăm Hâi Peăng hdroh xông tơplâ xâ. Vâ veăng kum tơxâng rơtế lâp tơnêi têa pêi pro ƀlêi trâng pơkâ pêi troh hơnăm 2030 tơnêi têa pin chiâng tơnêi têa dế mơnhông mơdêk ai kơmăi kơmok pêi cheăng tiô rơxông nếo, pêi lo liăn tơdâng hên; troh hơnăm 2045 tơnêi têa pin chiâng tơnêi têa mơnhông, pêi lo liăn hên; ƀă vâ rơtế mâu kong pơlê tung kơpong Đông Nam bộ po rơdâ pêi pro châ tơƀrê Pơkâ nếo dêi Khu xiâm kal kí, pôa Nguyễn Phú Trọng, Kăn xiâm pơkuâ hnê ngăn Đảng tối nhên:

“Á pơkâ thế mâu khu pú tung Khu pơkuâ Đảng ƀô̆ pơlê kong kân rơtế tá khu cheăng kal kí kal pơtối hriăn plĕng, mơnhên nhên xiâm kối, xo vế túa ki rơkê ƀă teăm tơdrêng ai mâu troăng hơlâ, troăng pêi tah lôi mâu tơdroăng châ tơƀrê. Mâu tơdroăng ki klâi hluâ hnoăng mê tơbleăng Tơnêi têa, Kuô̆k hô̆i, Chin phuh séa ngăn, pro tơ’lêi hlâu vâ tah lôi; tung mê, ai troăng pơkâ pêi, troăng hơlâ ki phá tơ-ê, châ tơƀrê hôm tâ tâng pơchông ƀă Pơkâ 54 dêi Kuô̆k hô̆i hneăng má XIV’’.

*Hơnăm 2016, Đảng ƀô̆, kăn pơkuâ ƀă Kuăn pơlê mâu hdroâng kuăn ngo cheăm Bản Bo, tơring Tam Đường, kong pơlê Lai Châu hâk tơngăm châ tơdah Kăn xiâm pơkuâ ngăn Đảng Nguyễn Phú Trọng - Kăn xiâm pơkuâ hnê ngăn Đảng lăm pôu. Pêi pro rơkong hnê pơchân dêi pôa tung rôh lăm pôu mê, kăn ƀô̆, đảng viên ƀă kuăn pơlê mâu hdroâng kuăn ngo tíu kố hiăng tơdjuôm ivá, môi hiâm mơno, ivá mơ-eăm tơkâ luâ pá puât, mơ-eăm chiâng tíu bâ tung mơnhông cheăng kâ, mơjiâng thôn pơlê nếo a kong pơlê.

Pôa Hạng A Sào, hdroâng Mông, a pơlê Nà Phát, cheăm Bản Bo, tơring Tam Đường ăm ‘nâi: Klêi kơ’nâi châ trâm ƀă châ kăn xiâm pơkuâ ngăn Đảng Nguyễn Phú Trọng mơhnhôk, rơpŏng pôa hiăng kơhnâ po pông ƀă pêt tơ’nôm ƀăng tơnêi pêt chế dêi rơpŏng.

“Meh Trọng - Kăn xiâm pơkuâ hnê ngăn Đảng tơmâng ngăn khât troh cheăng kâ vâi krâ nhŏng o. Meh troh pôu ngăn kơdrum chế rơpŏng hngêi á ƀă meh mơhnhôk rơpŏng á ƀă vâi krâ nhŏng o mơ-eăm tơkŭm rak ngăn dêi kơdrum chế vâ ai liăn ăm rơpŏng ton xŏn. Ing rơkong mơhnhôk dêi Kăn xiâm pơkuâ ngăn Đảng, vâi krâ nhŏng o tung pơlê hiăng mơ-eăm vâ rak ngăn ƀă tơkŭm pêi cheăng kâ ing kơdrum chế ƀă nôkố tơdroăng rêh ối dêi vâi krâ nhŏng o hiăng phâi, hơniâp ro”.

Pôa Nguyễn Phú Trọng - Kăn xiâm pơkuâ ngăn Đảng ƀă kăn pơkuâ kong pơlê rơtế kriê chế ƀă vâi krâ nhŏng o mâu hdroâng kuăn ngo cheăm Bản Bo, tơring Tam Đường hơnăm 2016.