Hneăng hôp mơnhên, 2 khế hiăng hluâ, tâi tâng Đảng, tâi tâng kuăn pơlê, tâi tâng khu lêng hiăng mơ-eăm châ tơƀrê hên mâu tơdroăng ki kal tung mâu kơvâ: Mơnhông cheăng kâ – rêh ối pơlê pơla, cheăng lêng, gâk kring, tơpui kâ ƀă kong têa ê, mơjiâng Đảng ƀă khu cheăng kal kí, tơdroăng cheăng kăn ƀô̆ ƀă tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro.

‘Na mâu tơdroăng cheăng ki xiâm tung la ngiâ, Kăn xiâm pơkuâ hnê ngăn Đảng tối nhên, pakĭng roh tơ’lêi hlâu, pin dế ƀă kô trâm ƀă hên pá puât, pơloăng mơnúa xua tơdroăng lâp plâi tơnêi pơtối ôh tá tơniăn, ôh tá ‘nâi tối hdrối, tơxup tơbriât kơtăng ó pơla mâu kong têa kân, tơplâ tơplong thăm rế hên; kong prâi hơ’lêh, pơreăng tơdjâk râ ó, xua mê mâu khu râ, mâu kơvâ cheăng pơtối mơnhông tâ mê nếo hiâm mơno tơrŭm, môi tuăn; tơrŭm tơtro, hnê mơhno pêi pro mâu hnoăng cheăng châ tơƀrê.

Tơkŭm pêi lĕm tro mâu tơdroăng cheăng vâ hbrâ hnê mơhno hneăng hôp Đảng mâu râ troh Hneăng hôp má XIV dêi Đảng; tơkŭm kêi đeăng mơ-éa chêh hdrối mâu mơ-éa ki kal Hneăng hôp má XIV dêi Đảng tơbleăng Hneăng hôp Tơnêi têa 10 tiô pơkâ, séa ngăn, tơ’nôm pơkâ mâu râ vâ hbrâ ăm tơdroăng tơkêa bro rah xo mơngế a hneăng hôp Đảng mâu râ.