‘’Tơnêi têa pin ta hâi choí hlo la lâi ai tơmeăm khoăng ƀă xông to a’ngêi, hnối châ hên kong têa loi tơngah má môi tiah hâi kố, ai tơ’nôm tơdroăng ki tơ’lêi hlâu vâ krá tơniăn cheâng prôk tiô troăng ki Đảng pin, kuăn pơlê pin ƀă Pôa Hồ mơjo pâ hiăng rah xo’’.

Kố cho rơkong vêh tơpui mơnhên dêi pôa Nguyễn Phú Trọng, Kăn xiâm pơkuâ hnê ngăn a Roh hôp má môi dêi Khu xiâm pơkuâ hnê ngăn Đảng hneăng 13 ƀă a hên roh hôp ki kal drêng Kăn xiâm pơkuâ hnê ngăn troh veăng hôp ƀă ai mâu rơkong tơpui ki kal má môi. Ti xê ga hmếo pơ ai xêh, tơdroăng ki Kăn xiâm pơkuâ hnê ngăn mơnhên tối ‘na tơdroăng kố, drêng ki păng ‘nâng ăm hlo, klêi kơ’nâi vâ chê 40 hơnăm pêi pro hnoăng cheăng pơhlêh nếo, ing môi tơnêi têa kơtiê, ai tơmeăm khoăng – kih thuât, tơdroăng ki mơjiâng cheăng kâ-rêh ối pơlê pơla ôh tá rơhéa, tơdroăng hriâm ôh ta rơkê hên, troh nôkố, Việt Nam hiăng mơnhông chiâng tơnêi têa ki dế mơnhông, châ pêi lo liăn ngân krâ kơvâ; túa lĕm tro, rêh ối pơlê pơla pơtối  mơnhông, tơdroăng rêh kâ ối, pêi lo tơmeăm khoăng, tuăn mơno dêi kuăn pơlê rế hía rế xông a’ngêi; hnoăng cheăng mơjiâng Đảng ƀă tơdroăng cheăng kal kí rế hía rế châ pơhlêh a’ngêi tâ; khu râ tơrŭm dêi pó ôh tá la lâi pơhlêh nếo; tơdroăng cheăng kal kí, rêh ối pơlê pơla, hnoăng cheăng kêng, kring vế, tơniăn krê, hnoăng pơkuâ tơnêi têa châ rak krá; xua ing ki rơkê ƀă châ hên kong têa vâi ê loi tơngah, rế hía tơdroăng rêh ối-pêi cheăng dêi tơnêi têa rế châ hên kong têa ê loi tơngah.

Krê tung hnoăng cheăng tơrŭm tơpui kâ ƀă kong têa troh a hneăng xông tơpui a Roh hôp tơŭm tơpui kâ tung lâp tơnêi têa, pôa Nguyễn Phu Trọng - Kăn xiâm pơkuâ hnê ngăn vêh mơnhên tối ‘na tơdroăng ki hiăng chiâng, mơnhông dêi Túa cheăng tơrŭm tơpui kâ ƀă kong têa ê, tơrŭm tơpui kâ dó inâi kơlá Việt Nam; xiâm krá, châ chut, tơkâng rơmuăn, mơhno tối hiâm mơno, túa cheăng ƀă ki rơkê, khên tơnôu dêi hdroâng Việt Nam’’ ƀă rế hía rế châ hên mâu kong têa tung lâp plâi tơnêi loi tơngah khât:

“Hmâ vâ hmâ ôh Kơvâ ngăn ‘na tơrŭm tơpui kâ ƀă kong têa ê pơtối mơhno dêi tuăn hiâm ki krâi trâng, rơkê plĕng ƀă túa tơrŭm cheăng dêi tơdroăng tơrŭm tơpui kâ rơxông Hồ Chí Minh ƀă pơtối mơhno tối ‘na tơrŭm cheăng khên tơnôu mâu tơdroăng ki rơkê plĕng, ‘nâi mơnê dêi hdroâng Việt Nam, pơtối pơhlêh nếo tung mơjiâng ƀă mơnhông ki kơvâ ngăn ‘na tơrŭm tơpui kâ Việt Nam chal nếo krá rơdêi tâi tâng mơhno tối ‘na ki rơkê kơnía khât dêi kơlá Việt Nam’’.

Môi tung mâu tơdroăng ki ối châ rak vế tung hneăng tơplâ mơdât khu kâ kơhveăm, kâ hơré, mâu tơdroăng pêi pro xôi roh apoăng hneăng 11 troh nôkố mê cho tơdroăng cheăng mơjiâng, ‘mâi rơnêu cheăng Đảng, pơtối thăm mơdêk pêi pro tơdrêng hnoăng cheăng, ing tơdroăng tơpui tối trâu rơdâ dêi pôa Nguyễn Phú Trọng - Kăn xiâm pơkuâ hnê ngăn, Kăn xiâm pơkuâ hnê tối tơnêi têa ‘na hbrâ tơplâ mơdât kâ kơluâ, kâ kơhveăm liăn ngân, kế tơmeăm, tơdroăng pro xôi. Kăn xiâm pơkuâ hnê ngăn vêh mơnhên tối, klêi kơ’nâi tơdroăng mơjiâng Khu xiâm hnê ngăn tơnêi têa, ối tung Khu xiâm ngăn ‘na cheăng kal kí troh nôkố, tơdroăng ki tong kâ liăn ngân ‘’hiăng chiâng tơdroăng cheăng ki tơbriât dêi pó, ôh tá ai troăng hơlâ ki lâi vâ kâi  mơdât’’.

Xua ti mê, ‘’Rêm tơdroăng ki hmếo pơ lôi, ví, kơteăng lôi”, “păm râng kơtâ liăn’’ lơ pêi pro ôh tá tro, khu ngế ki ôh tá tơdrăng, tâng vâi ki mê hôu tối mơngế ki ê, tăng hliăng vâ kâ kơhveăm liăn ngân, kế tơmeăm, pro ôh tá tơniăn tung khu cheăng, mâu tơdroăng mê pơrá ôh tá tro’’. Tiô Kăn xiâm pơkuâ hnê ngăn, mơjiâng, ‘mâi rơnêu pât tơdroăng cheăng Đảng cho hnoăng cheăng ki châ mơjiâng khu pêi cheăng, mơjiâng kuăn mơngế, cho hnoăng cheăng ‘na kuăn mơngế, ga tơ’lêi hmâ pro ôh tá tro a hiâm mơno, ki pơxúa, tơrŭm cheăng pơla kuăn mơngế. Xua ti mê, pơkal athế rêm ngế pin athế hôu tối, tơpui mơnhên, vêh tơpui leăng mâu tơdroăng ki tro, ki ôh tá tro dêi ing tơná; athế vêh mơnhên, séa ngăn hnoăng cheăng dêi vâi ki ê. Tâng ôh tá pêi pro kơhnâ khât tơdroăng kố, pêi ôh tá tơdrăng, ôh tá ối a tơdế, ga kô tơ’lêi trâm tơdroăng ki ta tơtro, ki hmâ hlo to ki tro dêi tơná, ki rơkê, ki rơdêi, i lĕm dêi tơná luâ hên tâ vâi ki ê; pơla mê, hlo tơdroăng ki xôi, tơdroăng ‘ro dêi vâi ê hên luâ tâ dêi tơná:

‘’Á hiăng hên hdroh ai tối, nôkố á vêh tơbâ nếo mâu ngế ki lâi ai tuăn mơno ki tiah kố mê athế tah lôi tơdrêng hlối, ăm vâi ki ê pêi, tơdroăng rêh ối kuăn mơngế bu ai môi hdroh, athế rêh kâ ối ti lâi vâ mâ tá tro xôi, ôh tá lĕm, xua mâu tơdroăng ki pro ôh tá tơdrăng, rơhăm git kơ liăn ngân, ôh tá ai châ djâ tơvế drêng hlâ ah. Inâi, hiâm mơno kuăn mơngế cho tơdroăng ki kal krih kơnía má môi’’.

Tung kơvâ túa lĕm tro drêng dế ối rêh nah, pôa Nguyễn Phú Trọng - Kăn xiâm pơkuâ hnê ngăn xuân tối nhên hnoăng cheăng ki kal dêi túa lĕm tro cho ki xiâm hiâm mơno, ivá cheăng ki vâ mơnhông mơdêk pơlê pơla. Xua kơnôm ai túa lĕm tro, tơdroăng cheăng ki tro, trâu lĕm khât dêi hdroâng mơngế ki pro xiâm, mê hdroâng mơngế pin hiăng tơkâ luâ hên tơdroăng ki pơloăng, mơnúa, ôh ta pơtê pơto, pơtối mơdêk tiô troăng hơlâ ki xiâm dêi tơdroăng chal vâi krâ roh nah. Xua ti mê, pôa Nguyễn Phú Trọng - Kăn xiâm pơkuâ hnê ngăn hiăng pơkâ thế, tâi tâng khu pơkuâ dêi tâi tâng Đảng, tâi tâng kuăn pơlê,, tâi tâng lêng kal pơtối hlê plĕng nhên tơdroănug ki kal dêi túa lĕm tro tung tơdroăng pơkuâ ngăn cheăng kăch măng, Đảng Kŏng san Việt Nam ƀă pôa Hồ Chí Minh, Kăn xiâm hnê ngăn hneăng hdrối đi đo mơnhên ngăn, tơveăng ăm hnoăng dêi túa lĕm tro, đi đo ngăn túa lĕm tro cho môi hnoăng cheăng tơplâ dêi kăch măng, cho on ki séa troăng ăm kuăn pơlê tung lâp tơnêi têa prôk. A roh hôp Túa lĕm tro Lâp tơnêi têa a hâi lơ 24/11/2021, pôa Nguyễn Phú Trọng, Kăn xiâm pơkuâ hnê ngăn hiăng ai tơpui tối, pơchân khĕn tơdroăng ki tơxâng pin tơmiât chôu vế:

‘’Vâi tối ngiâ méa kuăn mơngế ai túa lĕm tro, môi rơpŏng ai túa lĕm tro môi hdroâng mơngế ai túa lĕm tro, túa rêh ối lĕm tro, tơdroăng rêh kâ ối, pêi cheăng lĕm tro, túa tơrŭm tơpui kâ lĕm tro ƀă hên hĕng mâu tơdroăng ki ê. Ƀă mâu tơdroăng ki ‘mêi rơtoh, ‘nhiu ‘nháu, pơ’lăm pơlói, mâu tơdroăng pêi pro ki phá ƀă luât ki ‘mêi cho ôh tá ai lĕm tro, cho tơdroăng ki phá tơ-ê ƀă túa lĕm tro, tơdroăng rêh ối ki hơniâp ro dêi kuăn mơngế ôh ta xê tíu ki ai liăn hên, kế kâ kơhiâm, sap rơnuâ krip lĕm, mê ối cho tơdroăng ki kro mơdrŏng ‘na tuăn hiâm, châ ai tơdroăng ki hơ-ui mơjo ƀă khíu pâ, tơdroăng rêh ối ki tơtro ƀă tơdâng tơ’mô’’.

Dế ối rêh nah, rêm roh vâ tơpui tối, teăng ăm tơdroăng pơchân dêi tơná, pôa Nguyễn Phú Trọng - Kăn xiâm pơkuâ hnê ngăn hmâ vêh tơbâ môi tơdroăng ki hiăng chêh tối tung kơxop hlá mơ-éa ‘’Meăm hiăng klêi chuih ga khoh ‘răng kơtô tiah mê mê̆’’ dêi ngế chêh văn Liên Xô Nikolai Ostrovsky:

‘’Ki kơnía ó má môi dêi kuăn mơngế cho tơdroăng rêh ối ƀă tơdroăng pêi pro, xua ga, tơdroăng rêh ối kuăn mơngế bu môi rơxông tê. Athế rêh ối tiah lâi vâ ga mâ tá châi khéa, chiâng mréa dêi tơná xua hiăng pêi pro xôi, xua mâu khế hơnăm hdrối mê hía nah rêh ối, pêi pro ôh ta tro, ôh ta ai pơxúa ki klâi; vâ pôi ta kơmêi kơxiâp xua mâu tơdroăng tơná hiăng pro xôi, ôh tá tro luât, tơdroăng ki tro rêm ngế pơrá ngăn tối hjăm dría; vâ ga troh a hâi kơtê i hiâm ah, pin chiâng tối tiah kố: Plâ rơxông, plâ chal pin, tâi tâng ivá tơná, pin hiăng pleăng ăm hnoăng cheăng ki lĕm tro má môi-troăng hơlâ ki pro tơleăng lĕm ăm hdroâng mơngế, châ tơleăng lĕm ăm kuăn mơngế, pro pơxúa, hơniâp niân ăm kuăn pơlê’’.