Hâi lơ 16/9 a Ƀơrô Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ rôh hôp ƀă mâu kăn xiâm, kơvâ cheăng ki tơdjâk troh, tơpui trâu troh tơdroăng tơbleăng Pơkâ 36 ‘na Tơdroăng pêi pro mơnhông krá tơniăn cheăng kâ Việt Nam troh hơnăm 2030, tơdroăng vâ pêi troh hơnăm 2045  ƀă mâu  tơdroăng tơdjâk troh tung Pơkâ hneăng hôp má XIII dêi Đảng.

Ing mê tối nhên, tŭm tơdroăng tung lâp plâi tơnêi, tung kơpong ƀă Biển Đông xuân môi tiah tơdroăng mơnhông tơnêi têa tung tơdroăng nếo nôkố, pôa Phạm Minh Chính, Ngế pro xiâm hnê ngăn Chin phuh hnê mơhno rêm khu xiâm, kơvâ cheăng ƀă kong pơlê ki tơdjâk tung la ngiâ kal pơtối tơmâng pêi pro tiô troăng dêi Đảng, luât tơnêi têa, tung mê, ai Pơkâ hneăng Hôp má 13 dêi Đảng, Pơkâ 36 ‘na Troăng hơlâ mơnhông krá tơniăn cheăng kâ a têa kơxĭ Việt Nam troh hơnăm 2030, mâ ngăn troh hơnăm 2045; tơdroăng Pơkâ 44 ‘na troăng hơlâ kring vế Tơnêi têa tung tơdroăng rêh ối nếo, hbrâ rơnáu, kơhnâ khât, tơbleăng pêi pơxúa mâu tơdroăng cheăng, ai tiô tơdroăng ki kal, ki tơƀrê tâ tŭng tŭm tơdroăng.