A rôh tơdah, pôa Phạm Minh Chính - Ngế pro xiâm hnê ngăn Chin phuh hâk mơnê hneăng lăm pôu rôh má péa dêi ngế xiâm tơpui kâ Brazil troh a Việt Nam ƀă tối mâu tơdroăng ki hlo tơviah lĕm ‘na tơnêi têa ƀă kuăn mơngế Brazil tung hneăng lăm pôu a khế 9/2023 kố nah; khĕn kơdeăn khât mâu luât pơkâ tŏng kum dêi Chin phuh pôa Lula da Silva Kăn xiâm pơkuâ kong têa vâ ‘mâi mơnhông ki rơdêi ‘na cheăng kâ, kal kí, hnoăng cheăng pêi ki tro dêi Brazil a kơpong ƀă tung lâp plâi tơnêi.

Klêi mê, hlối loi tiah kố, hneăng pôa Mauro Viera - Ngế xiâm tơpui kâ  kô veăng mơdêk tâ nếo tơrŭm cheăng tung tŭm tơdroăng pơla Việt Nam - Brazil cho troăng pêi pro ki nhên vâ tơbleăng mâu tơdroăng tơhrâ dêi kăn xiâm péa tơnêi têa tung mâu hơnăm hdrối, malối mâu kơvâ cheăng dêi péa tơnêi têa ki ai hlâu ‘na tơmeăm khăng ƀă tơdroăng vâ pêi, xua vâ pro pơxúa dêi kuăn pơlê péa tơnêi têa, xua vâ pro hơniâp lĕm, tơrŭm ƀă mơnhông tơƀrê a péa kơpong ƀă tung lâp plâi tơnêi.

Pôa Mauro Vieira tối tơbleăng ƀă Ngế pro xiâm hnê ngăn Chin phuh ‘na mâu tơdroăng tơpui tơno ƀă pôa Bùi Thanh Sơn - Ngế xiâm tơpui kâ; ăm ‘mâu péa pâ tối mâu tơdroăng pêi pro inhên hlối vâ môi tuăn ‘na tơdroăng tơrŭm cheăng pơla  Việt Nam - Brazil tung la ngiâ, malối cho mâu tơdroăng cheăng ki péa pâ rơtế ai hlâu ƀă tơmâng khât mê cho pêi chiâk, ‘na khoa hok kŏng ngĕ, pơ’lêh on tơhrik, xúa on tơhrik sinh hok ƀă hên ki ê.