Troăng kơxái 500 kV mạch 3 cho pơla sap kơphô̆ Nối, Hưng Yên troh Quảng Trạch, Quảng Bình, pơla troăng tơkâ luâ mâu kong pơlê Thanh Hóa, Nghệ An, Hà Tĩnh. Kố cho rôh hôp má 4 xua Ngế pro xiâm hnê ngăn Chin phuh pơkuâ, séa ngăn, mơhnhôk thế tơbleăng tơdroăng tơkêa bro tung pơla 6 khế hdrối.

Mơ’nui rôh hôp, pôa Phạm Minh Chính - Ngế pro xiâm hnê ngăn tơnêi têa tối troăng kơxái on tơhrik 500 kV mạch 3 cho tơdroăng tơkêa pro ki kal ai pơxúa khât ‘na cheăng kâ - rêh ối pơlê pơlâ, kring vế tơniăn, cheăng lêng dêi Tơnêi têa ƀă tơniăn rêh ối ăm mâu kơpong ki ai troăng kơxái on tơhrik hnhâng luâ. Ngế pro xiâm hnê ngăn tơnêi têa pơkâ thế mâu tíu pêi cheăng pro rĕng tâ nếo vâ rĕng kêi, la thế pêi lĕm krá tơniăn, tro kih thuât, ngăn lĕm, mơngế pêi cheăng tơniăn.

Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kong pơlê, tíu pêi cheăng mơ-eăm pê klêi tơdroăng tơkêa bro vâ koh tơbâ 79 hơnăm hâi Kăch măng khế 8 ƀă hâi mơjiâng Tơnêi têa lơ 2/9.