Teăng mâ Kăn xiâm Đảng, Tơnêi têa, Ngế pro xiâm hnê ngăn tơnêi têa rơkâu vâi o hok tro môi rơnó pơtê hriâm phiu ro, tơniăn ƀă dêi nôu pâ pú hmâ. Ngế pro xiâm hnê ngăn tơnêi têa ăm ‘nâi, mâu hơnăm hdrối nah, Đảng, Tơnêi têa pin đi đo tơmâng khât troh tơdroăng kring vế, rak ngăn vâi hdrêng, pro tơ’lêi hlâu ăm vâi hdrêng châ châ piê lĕm, ai tíu rêh ối tơniăn ro; nhoăm, tơmâng, séa ngăn, tiâ mâu tơdroăng hnê tối, púi vâ dêi vâi hdrêng; ôh tá pơrah ngế ki lâi ƀă tơniăn má môi ăm vâi hdrêng tung mâu tơdroăng pơkâ tơdjâk tro; ngăn mê cho tơdroăng pêi pro ton ta ah.

Rêm râ, kơvâ cheăng, mâu kong pơlê, mâu khu tơrŭm cheăng pơlê pơla, khu râ ƀă kuăn pơlê đi đo tơmâng ‘no liăn mơjiâng pro tơmeăm khoăng, tơmâng khât tơdroăng hnê hriâm, kring vế, rak ngăn vâi hdrêng, malối ƀă vâi hdrêng kơtiê, vâi hdrêng ai tơdroăng tơrêh pá puât, vâi hdrêng chó chêng, plôm mâ, klêk tuăn, kuăn tê.