A hneăng hôp WEF Đại Liên, ƀă tơdroăng ki má môi cho ƀai xông tơpui a Roh pơxiâm po tâi tâng, a ngiâ dâng 1.700 tơmối ing 80 kong têa. Ngế pro xiâm hnê ngăn Chin phuh hiăng tối tơdroăng ki vâ mơhnhôk dêi Việt Nam ‘na pơhlêh nếo, mot tơrŭm ƀă mơnhông. Ngế pro xiâm hnê ngăn Chin phuh xuân pơtroh tơdroăng pơtâng hnê tối trâu hơhngế, inhên ‘na mâu tơdroăng ki má môi ‘na cheăng kâ – rêh ối pơlê pơla, ‘na troăng hơlâ, tơmiêt pêi la ngiâ, troăng prôk ton xŏn mơnhông tơnêi têa dêi Đảng, Tơnêi têa Việt Nam.

Tung roh lăm pôu pêi cheăng, pôa Phạm Minh Chính hiăng ai tơdroăng pêi cheăng pơla péa pâ cho hên tơdroăng, tá tơdroăng trâm mâ, tơpui tơno ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ, pôa Lý Cường, Ngế pro xiâm hnê ngăn kong têa Sinuâ, pôa Vương Hộ Ninh, Kăn hnê ngăn tơdroăng kal kí kong têa Sinuâ; rơtế pôa Trương Quốc Thanh, Ngế pro xiâm phŏ hnê ngăn kong têa Sinuâ veăng ƀă xông tơpui a ‘’Hneăng hôp tơrŭm cheăng Việt Nam – Sinuâ ‘na mơjiâng hngêi trăng troăng klông ƀă hnoăng dêi mâu khu tê mơdró Việt Nam – Sinuâ.