Kơxê lơ 11/9, Khu kăn pơkuâ ngăn Chin phuh xua tơdroăng pơkuâ po dêi pôa Phạm Minh Chính, Ngế pro xiâm hnê ngăn Chin phuh hiăng hôp ‘na tơdroăng mơjiâng luât tung mê tơpui tơno ƀă ăm rơkong veăng tơpui tối ‘na tơdroăng tơkêa Luât ‘mâi rơnêu, ‘mot tơ’nôm mâu tơdroăng dêi Luât Chứng khóan, Luât Kế toán, Luât Kiểm toán độc lập, Luât Liăn ngân tơnêi têa, Luât Pơkuâ ngăn, xúa kế tơmeăm tơdjuôm, Luât Pơkuâ ngăn nâp hnoăng liăn mơhá, Luât ‘Măn kơdĭng.

Hlo tơdroăng ki kong mê khía mơhot têa kân lân lu tơdjâk ó pro hlâ ƀă hía vâ chê 300 ngế, 780 ngế tro rong, hên kế tơmeăm báu prá alâi, kơpôu, ro, chu, í, peâp hlâ, tơpui pơxiâm po rôh hôp ‘na mơjiâng luât, pôa Phạm Minh Chính, Ngế pro xiâm hnê ngăn tơnêi têa pơtroh rơkong kơ-êng, sĭng khéa dêi pôa Tô Lâm, Kăn xiâm pơkuâ hnê ngăn Đảng, kăn xiâm hnê ngăn tơnêi têa prế pôa Phạm Minh Chính, Ngế pro xiâm hnê ngăn tơnêi têa xuân hiăng pơtroh rơkong veăng sĭng khéa troh mâu rơpŏng hngêi ki ai ngế xâu xía xua kong mê têa kân ƀă tơnêi tơhnâp.

Tơdrêng amê hlối pơkâ thế mâu kong pơlê pêi pro tro troăng hơlâ tŏng gum, liăn ngân kum ‘mế ăm kuăn pơlê ki hlâ. Ngế pro xiâm hnê ngăn Chin phuh krếo thế kuăn pơlê, khu tơrŭm, khu mơdró kâ, kơ koan, kong pơlê ki tro tơ’nhiê kế tơmeăm, xua tơdjâk dêi khía mơhot, tung hiâm mơno “tơmeăm iâ la hiâm mơno kân, ai hên gum hên, ai tơmeăm gum tơmeăm, ai hnoăng gum hnoăng “, “tŏng dêi rơpó”, “ngế ki niân gum ngế ki pá tâ, ngế ki pá kum ngế ki pá tâ vâ tơkâ luâ rôh ki pá puât kố.