A Hneăng hôp, pôa Phạm Minh Chính, Ngế pro xiâm hnê ngăn tơnêi têa rơrêk tung hiâm mơno pơtroh rơkong kơ-êng, tŏng gum, hơlêm dêi Khu xiâm kal kí, Khu pơkuâ hnê ngăn cheăng Đảng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă khu râ kăn pơkuâ hnê ngăn Đảng, Tơnêi têa troh mâu kơ koan, kong pơlê, tíu cheăng ƀă ki má lối cho mâu rơpŏng ai mơngế hlâ, hía, tro tơdjâk xua kong mêi khía mơhot roh má 3 pro.

Ngế pro xiâm hnê ngăn tơnêi têa tối ăm ‘nâi, ƀă hiâm mơno tŏng kum dêi pó, mâu ngế ki chía hôm iâ kum mâu ngế pá puât, Vi ƀan Xiâm Măt trâ̆n Tơnêi têa Việt Nam hiăng tơkŭm po leh mơhnhôk tŏng gum kuăn pơlê tro lŭp xua kong mêi khía mơhot roh má 3 pro, ƀă tâi tâng kơxô̆ liăn troh nôkố cho lối 1.000 rơtal liăn. Chin phuh hiăng tŏng gum mâu kong pơlê lối 350 rơtal liăn, 300 tâ̆n phái ƀă hía hé ƀă dế pơtối riên vâ tŏng gum kong mêi khía mơhot roh má 3 ƀă xua hiâm mơno hdroâng mơngế, tuăn pâ kuăn pơlê, xua tơdroăng rêh ối dêi kuăn pơlê ƀă ki xiâm cho: Ôh tá lôi kuăn pơlê ki lâi ôh tá ai bê kế kâ, ôh tá ai tŭm hmân ếo xâp, tro kơklêa hngíu, ôh tá bê têa krúa, ôh tá ai tíu ối, mâu tơdroăng kal xúa tung rêh ối rêm hâi.