Qatar cho tíu ki pơtê chêng má mơ’nui tung rôh pêi dêi hnoăng cheăng a 3 to kong têa Trung Đông dêi pôa Phạm Minh Chính, Ngế pro xiâm hnê ngăn Chin phuh ƀă kơdrâi pôa rơtế ƀă khu kăn xiâm Việt Nam. Kố cho rôh pôu păng ‘nâng apoăng dêi Ngế pro xiâm Chin phuh Việt Nam troh Qatar klêi kơ’nâi 15 hơnăm, po tung pơla tơrŭm pơla péa kong têa dế tung ivá mơnhông tơniăn lĕm ƀă hên tơdroăng pêi pro ai pơxúa.

Nôkố Qatar cho kong têa tơrŭm cheăng kâ, ‘no liăn cheăng hên má môi dêi Việt Nam. Ƀă tơdroăng tơrŭm cheăng tơniăn lĕm tâ pái chât hơnăm hdrối, rôh lăm pôu păng ‘nâng Tơnêi têa Qatar dêi Ngế pro xiâm hnê ngăn Chin phuh - pôa Phạm Minh Chính rôh kố kô veăng gum ‘mâi mơnhông loi tơngah tơdroăng kal kí pơla péa tơnêi têa; pro ivá, po hneăng tơrŭm cheăng nếo tung tơrŭm cheăng Việt Nam – Qatar; malối tung tơ’mot ‘no liăn cheăng ing Qatar a Việt Nam ƀă pro ivá mơnhông tơƀrê ăm mâu kế tơmeăm, tê mơdró dêi Việt Nam châ tê tung kơchơ tê mơdró Qatar ƀă tung kơpong.