Hâi lơ 12/9, pơtối roh séa ngăn tơdroăng tro lŭp tơmeăm khoăng xua têa kân lân lu pro, pôa Phạm Minh Chính, Ngế pro xiâm hnê ngăn tơnêi têa ôh tá kâi mơdât dêi têa mâ drêng troh thôn Làng Nủ, cheăm Phúc Khánh tơring Bảo Yên, kong pơlê Lào Cai. Tiô tơbleăng, kong pơlê Lào Cai ai 6/9 tơring, pơlê kong krâm, pơlê kong kơdrâm ai ngế hlâ. Tâi tâng mơngế tro rong cho 255 ngế, tung mê 98 ngế hlâ; 81 ngế hía, 76 ngế tro rong.

Krê a thôn Làng Nủ, cheăm Phúc Khánh, tơring Bảo Yên hiăng tăng hlo 44 ngế hlâ. Ngế pro xiâm hnê ngăn tơnêi têa tâ châi hiâm ‘nâng, chu a tíu ki tơnêi tơhnah tơhnâp trâm treng, tíu kuăn pơlê tro tơnêi kơđu, rơtế ƀă khu lêng, kŏng an ti tăng châ kuăn pơlê ki ôh tá mơhúa ƀă tối ăm dêi pó túa ki rơkê ti tăng mơngế trâm xía vâ ƀă mâu khu tŏng gum.

Pêi cheăng ƀă khu râ kăn pơkuâ tơring, Ngế pro xiâm hnê ngăn tơnêi têa rơrêk tung hiâm pơtroh rơkong hơlêm ƀă mâu ngế trâm xía vâ. Ngế pro xiâm hnê ngăn tơnêi têa pơkâ tơkŭm khu ti tăng 51 ngế dế hía, ƀă mâu ngế ki tro rong thế rak ngăn pơlât tŭm. Thế mơgrúa kong prâi, hbrâ mơdât pơreăng, mơgrúa troăng klông. Ngế pro xiâm hnê ngăn tơnêi têa pơkâ thế mât trâ̆n tơnêi têa, mâu đoân theh rak ngăn kuăn pơlê tíu kố teăm tơdrêng; mơnê khu kŏng an, khu mô đô̆i hiăng troh teăm tơdrêng kum kuăn pơlê tíu kố.