A roh tơdah, péa pâ dế thăm pêi pro kơtăng mâu tơdroăng môi tuăn dêi khu râ kăn xiâm pơkuâ, pơkâ pêi tơrŭm cheăng pơla péa Chin phuh hơnăm 2024, mâu tơbleăng tơdjuôm, tơdroăng châ tơƀrê mâu roh lăm pôu, pêi cheăng pơla khu râ kăn xiâm péa tơnêi têa, tung mê, rak tơpui tơno mâu khu râ kăn.

Ngế pro xiâm hnê ngăn Chin phuh pơkâ thế tung la ngiâ, Kơ koan séa ngăn Đảng, Kăn séa ngăn Tơnêi têa Tơnêi têa péa tơnêi kal tơrŭm mơjiâng pơkâ po rơdâ pêi pro châ tơƀrê mâu tơdroăng môi tuăn khu râ kăn xiâm, mâu troăng tơrŭm cheăng hiăng ai, tơdroăng châ tơƀrê Hneăng hôp má 46 Vi ƀan Chin phuh Việt Nam - Lếo, tung mê mơdêk mơnhông tơrŭm cheăng kâ tíu tê mơdró ngi kong têa ê, mơdêk mâu tơdroăng tơkêa bro tơdjêp troăng klông, tơdjêp tê mơdró, tơdjêp mâu tơdroăng cheăng kâ môi tiah kơno tuk Vũng Áng, troăng kân ăm phêp rơxế kơtâu têi Hà Nội – Vientiane, troăng rơxế lơtreng Vientiane – Vũng Áng.